Skartgripahönnuðurinn Hendrikka Waage heldur málverkasýningu á verkum sínum í versluninni Evu. Sýningin hefst í dag og stendur til 22. ágúst.Hendrikka hóf að mála fyrir rúmum þremur árum og hefur að undanförnu stundað nám við London Academy of Arts, samhliða starfi sínu sem skartgripahönnuður.

Verk Hendrikku eru unnin með olíupastel og eru mjög litrík.

Sagt að gleyma módeli

„Þetta er áhugamálið mitt. Ég hélt fyrstu sýninguna mína á Íslandi í júní og þá seldust allar myndirnar upp,“ segir Hendrikka. Hún býr að staðaldri í sveitinni fyrir utan London í Bretlandi, en er nú stödd hér á landi. Um er að ræða portrett myndir sem gerðar eru án módels. „Kennarinn minn sagði mér að ég væri með einhvern stíl, líka þegar ég var að mála með módel fyrir framan mig. Hann sagði mér að gleyma þessu og hvatti mig til að halda áfram með þennan stíl.“

Eitt eyra

Um er að ræða olíupastelverk sem byggja á sömu heildarhugmyndinni, en þau eru mjög litrík. „Ég kalla þetta Dásamlegar verur. Þetta er naívismi og mjög litaglatt. Ég fæ sjálf mjög mikla gleði af því að mála þessar myndir og ég vona að það sjáist á þeim. Það er ótrúleg gleði sem fylgir því að klára hvert verk.“

Innblásturinn að litadýrðinni sækir Hendrikka til Önu Tzarev.

Innblástur frá merkilegum listakonum

Þá vekur athygli að verurnar eru aðeins með eitt eyra. „Þú þarft ekki að hlusta á allt, það er það sem ég túlka út úr þessu, en ég vil leyfa áhorfandanum að túlka verkin á þann hátt sem hann sér þau.“

Innblásturinn sækir hún til tveggja merkilegra kvenna. „Annars vegar Gloriu Vanderbilt, sem féll frá í fyrra. Ég hef fylgt henni í gegnum lífið, allt frá því mamma talaði um hana þegar ég var lítil. Hún var mikil listakona. Síðustu ár fór hún að búa til afskaplega skemmtilegar myndir sem hún sýndi á Instagram,“ segir Hendrikka. Svo er það króatíska listakonan Ana Tzarev. „Hún er stórkostlegur listamaður sem notar mikið þessa skæru liti, hún hefur veitt mér mikinn innblástur.“

Hægt er að fylgjast með Hendrikku á Instagram undir Hendrikkawaagepersonal.

Hendrikka leyfir áhorfendum að túlka hví verurnar hafa eitt eyra.