Andrea er með fallegan og klassískan fatastíl sem tekið er eftir og hefur gaman af að raða saman mismunandi outfittum við klassískan blazer jakka. Andrea er 25 ára gömul og býr í Garðabænum. Hún útskrifaðist í sumar með BS-gráðu í Viðskiptafræði með markaðsfræði sem aukagrein og diplómanámi í stafrænni markaðssetningu. „Ég hóf nýverið störf hjá Datera sem er ótrúlega skemmtilegur og gefandi vinnustaður og haustið verður spennandi tími,“ segir hún.

Andrea fylgist með tískustraumunum og nýtur þess að sjá nýju trendin fyrir haustið. „Ég fylgist mikið með áhrifavöldum til að fá innblástur á þeirra stíl á Instagram og fíla mest stílinn frá Danmörku,“ segir Andrea, sem spáir ávallt í hverju hún klæðist þegar hún fer í vinnuna.

Dragtin sem Andrea klæðist hér klæðir hana einstaklega vel og er fullkomin haustdragt. Dragtin er frá Maía, bolurinn og skórinn frá Konur Boss. FRÉTTABLAÐIÐ/ERNIR.

Stíllinn afslappaður og stílhreinn

Hvernig myndir þú lýsa fatastílnum þínum? „Ég myndi lýsa stílnum mínum sem mjög afslöppuðum, svörtum og stílhreinum. Fer eftir skapi hvernig ég klæði mig en mér finnst geggjað að grípa blazer yfir mismunandi outfit og poppa þannig upp á lúkkið.“

Þegar kemur að vali að sniðum, er eitthvað sem heillar þig frekar en annað?

„Já, ég er mikið fyrir oversized eða yfirstærð, sem ég elska að para við sokkabuxur eða þröngar buxur.“

Þegar kemur því að klæða sig eftir árstíðum er það eitthvað sem á við þig?

„Já, ég elska tískuna sem fylgir haustinu, svo afslöppuð, þá notar maður mikið kápur og stígvél.“

Hver er þín tilfinning fyrir hausttískunni, hvað heldur að verði heitt í haust?

„Cargo-buxur og co-ords. Ég heillast mjög mikið að co-ords sem þú getur líka blandað saman við aðrar flíkur.“ Co-ords eru samstæðar flíkur, toppur og buxur eða pils. Getur líka verið dragt og carco-buxur eru sportlegar og oft með stórum vösum á skálmunum.

Andrea klæðist hér fallegum himinbláum blazer kjól úr Zöru sem er tvíhnepptur og gerir hann virðulegan fyrir vikið. Skórnir eru frá GS skór.

Elskar að kaupa nýjan blazer

Aðspurð segir Andrea að hennar uppáhaldsflíkur séu oversized blazer, eða blazer í yfirstærð. „Þú getur alltaf poppað upp mismunandi outfit með góðum blazer. Ég elska að kaupa mér nýjan blazer og á mikið af þeim í alls konar litum og týpum.“ Andrea segist ekki endilega fylgja tískustraumum þegar kemur að litavali á þeim flíkum sem hún velur sér, hún velji sér frekar flíkur sem henni finnst klæða sig best. „Ég er mikið í svörtu en stundum er ég til í liti og þá fer ég alveg í skæra liti eins og skærgrænan eða bleikan.“

Áttu þinn uppáhaldsfatahönnuð?

„Mér finnst allt sem kemur frá Anine Bing sjúklega flott og passa vel fyrir minn stíl.“

En þau tískuvörumerki sem heilla þig mest?

„Hugo Boss, Sand, Gustav Denmark, Zara & Djerf Avenue.“

Aðspurð segist Andrea elska strigaskótískuna. „Þá nota ég þá bæði fínt og hversdags en svo nota ég mikið fínni skó líka eins og loafers frá Billi Bi.“ Loafers eru sléttbotna mokkasínur.

Það vefst ekki fyrir Andreu hvaða fylgihlutir henni finnast ómissandi að eiga í dag, blazerinn steinliggur þar. „Góður blazer og sneakers er must have,“ segir Andrea sem leyfir sér að sletta aðeins.

Afslappaður klæðnaður er í anda Andreu og hér er hún í þægilegum svörtum kjól frá Zöru sem skartar þessari skemmtilegu klauf. Blazerinn settur punktinn yfir i-ið og skórnir steinliggja við dressið en þeir eru frá Axel Arigato. FRÉTTABLAÐIÐ/ERNIR