Ljúfasta helgarminningin úr æsku tengist systur minni, Særúnu Leu og flestar af eftirlætis minningum mínum frá uppvaxtarárunum eru tengdar henni. Það var skemmtilegast að fá að tjalda úti á túni, fá snakk í skál, vasaljós og segja draugasögur fram á nótt,“ segir tónlistarkonan Fríða Dís Guðmundsdóttir í upphafi helgar.

Fríða Dís er uppalin í Sandgerði en hefur búið í höfuðstaðnum frá því um tvítugt.

„Ég byrja hvern dag á kaffi og tónlist setur tóninn fyrir daginn. Ég er mikil stemningsmanneskja og hrífst auðveldlega með umhverfinu svo ég reyni að hafa venjurnar góðar. Ferskt loft og útivera með syni mínum og skokk er gulls ígildi og gott til að hreinsa hugann. Ég er einfari í eðli mínu og þarf rými til að hugsa og skapa en góður matur með góðum vinum er líka í uppáhaldi. Ferðalög, sýningar, tónleikar og náttúran er allt sem veitir mér innblástur og nærir sálina,“ svarar Fríða Dís, innt eftir helgarlífi drauma sinna.

Fríða Dís er gift Þorsteini Surmeli og eiga þau hjónin tveggja ára son. Því eru helgarnar oftast helgaðar fjölskyldunni þegar Fríða Dís er ekki að spila einhvers staðar en hún hefur tekið þátt í mörgum tónlistartengdum verkefnum í gegnum tíðina, eins og hljómsveitunum Klassart, Eldum og Trilogiu.

„Við nýtum hverja helgi í að hitta vini okkar og leyfa börnunum að leika, sækjum viðburði og gerum eitthvað skapandi og skemmtilegt saman. Við erum líka nýflutt svo helgarnar fara gjarnan í það núverið að ditta að hérna heima. Annars er ég oftast komin mjög fljótt úr náttfötunum um helgar og vil fara að gera eitthvað. Þá er það oftast náttúran og útivera með syninum sem kallar,“ segir Fríða Dís.

Nýja platan hennar Fríðu Dísar heitir Myndaalbúm og segir hún lögin raðast eins og ljósmyndir í myndaalbúmi.

Persónulegt yrkisefni

Fríða Dís hóf nýverið að vinna að sólóefni og gaf á dögunum út sína fyrstu sólóplötu, Myndaalbúm. Á henni eru átta frumsamin lög, sex á íslensku og tvö á frönsku.

„Yrkisefnið er persónulegt. Lögin tengjast minningum og reynslu úr mínu lífi og raðast eins og ljósmyndir í myndaalbúmi. Ég samdi þau á sex ára tímabili undir mismunandi kringumstæðum og hefur ferlið á plötunni verið tilfinningaleg úrvinnsla þar sem atburðum fortíðar er fundinn farvegur. Laglínan og textarnir fæðast oftast á sama tíma og svo er bassinn oftast fyrsta hljóðfærið sem kemur inn; það er svona fyrsta hljóðfæri sem ég grip í og því eru laglínur og bassalínur þéttofnar saman og eru kannski mitt helsta höfundareinkenni,“ útskýrir Fríða Dís sem er með B.A.-próf í listfræði.

„Í gegnum tíðina hef ég átt fremur erfitt með að tala um tilfinningar mínar og vil helst halda þeim út af fyrir mig. Það er mér mjög eðlislægt að finna tilfinningum mínum farveg í gegnum listsköpun og er það mín þerapía. Með þessari plötu langar mig aftur á móti að bæta ráð mitt og vera óhræddari við að tjá hug minn og treysta öðrum betur. Ég er mjög mikil tilfinningavera og ástríðufull í því sem ég geri og þarf að koma kvíðanum og myrkrinu úr systeminu og opna á betra flæði. Það er margt sem brennur á mér og liggur mér á hjarta svo sólóplöturnar verða örugglega fimmtán,“ segir Fríða Dís og kímir.

Á nýju plötunni stjórnaði hún útsendingum sjálf ásamt því að syngja, leika á bassa, rafmagnsgítar, flautu, áslátt, syngja raddir og hanna plötuumslagið.

„Ég fékk því algjört listrænt frelsi til að hafa plötuna nákvæmlega eftir mínu höfði og það var akkúrat það sem ég þurfti.“

Með barnabók í pípunum

Fríða Dís á afmæli í dag, laugardaginn 15. febrúar, og verður 33 ára. Af því tilefni ætlar hún að blása til veislu í Hljómahöllinni í Reykjanesbæ í kvöld og fagna útgáfu plötunnar.

„Með mér koma fram Smári Guðmundsson á gítar, Stefán Örn Gunnlaugsson á píanó og syntha, Kristinn Snær Agnarsson á trommur, Óskar Guðjónsson á saxófón, Matthías Stefánsson á fiðlu og gítar og Óskar Þór Arngrímsson sér um áslátt. Við ætlum að flytja plötuna í heild sinni og skyggnst verður á bak við lögin og töfrana sem áttu sér stað í upptökuferlinu,“ upplýsir Fríða Dís um tónleikana í kvöld.

„Svo er planið að fylgja plötunni minni eftir, spila sem víðast og taka upp nokkur tónlistarmyndbönd. Hljómsveitin mín, Klassart, er einnig að fara í upptökur á lögum sem við sömdum við ljóð Hallgríms Péturssonar. Svo þarf ég að dusta rykið af teikniborðinu því ég er með barnabók og lag í stíl í pípunum sem ég þarf að koma frá mér. Ég er líka strax farin að huga að næstu sólóplötu,“ segir Fríða Dís og iðar í skinninu að fara að semja og útsetja eitthvað nýtt.

Helgin hennar Fríðu Dísar:

Hvort ertu morgunhani eða næturhrafn?

Ég er B+ manneskja í A+ lífsstíl.

Besti helgarmaturinn?

Sushi.

Bestu helgargestirnir?

Vinir og fjölskylda.

Besta helgardekrið fyrir þig sjálfa?

Útiskokk og langt bað með kertaljósum og tónlist.

Hvað færðu þér á kósíkvöldi?

Ég er mest bara í teinu á kvöldin og finnst gott að fá mér ber og ávexti, en papriku- eða chili-snakk er eftirlætis nammið mitt.

Á hvað hlustarðu til að koma þér í helgarskapið?

Con Todo El Mundo með Khruangbin.

Hvert ferðu á djammið?

Ég hef voða lítið stundað næturlífið undanfarin ár, en ef ég fer eitthvað út er það helst til að sækja tónleika.

Hvaða bíómynd gætirðu horft á aftur og aftur?

Spirited Away eftir Hayao Miyazaki.

Hvor er betri, laugardagur eða sunnudagur?

Laugardagur, þá á maður sunnudaginn inni.