Felix Bergsson, leikari og fjölmiðlamaður, lýsir mikilli ánægju með langan og innilegan koss Víkings og Ebo í næst síðasta þætti Ófærðar 2 sem sýndur var á RÚV í gærkvöld.

„Dásamlegt að fá svona fallegan hommasleik á primetime í sjónvarpi allra landsmanna. Hafiði pælt í hvað þetta gerist sjaldan? Meira af þessu! #ófærð,“ skrifar Felix á Twitter 

Kossar samkynhneigðra eru vissulega sjaldséðir í íslensku dagskrárefni og engum blöðum um að fletta að þessi ófærðarkoss þeirra Víkings og Ebo er tímamótasleikur.

Vegan vandræðaunglingur

Heldur betur dró annars til tíðinda í þættinum og spennan er að ná hámarki þannig að áhorfendur fóru margir hverjir á yfirsnúning á Twitter í gærkvöld og beindu spjótum sínum enn og aftur ekki síst að Þórhildi, dóttur Andra löggu, sem virðist hafa fest sig rækilega í sessi sem leiðinlegasti unglingur íslenskrar kvikmyndasögu.

Stúlkunni, sem Elva María Birgisdóttir leikur, er þó ekki alls varnað og á Facebook-hópnum Vegan Ísland þykir fólki augljóst að stúlkan er vegan og láti ekki hvað sem er ofan í sig og alls ekki rækjusamlokur eins og kom á daginn í þættinum í gærkvöld.

Þá rennir ósk hennar um dökkt súkkulaði í vegasjoppu stoðum undir þessa kenningu auk þess sem glöggir áhorfendur hafa rekið augun í veggspjöld gegn neyslu dýraafurða á veggjunum í herbergi hennar.

Samfélagsleg meðvitund og ábyrgð persónunnar og handritshöfundanna hrekkur þó skammt þar sem þeir sem finna Þórhildi flest til foráttu halda matvendninni gegn henni á Twitter.