María Gomez heldur úti matarblogginu Paz.is sem ætlað er nautnaseggjum sem hafa gaman af því að baka og elda góðan mat án mikillar fyrirhafnar, en flestar uppskriftirnar eru í einfaldari kantinum. María er mikill sælkeri og segist alltaf hafa haft gaman af því að reyna fyrir sér í eldhúsinu og fáum við að birta úrval uppskrifta úr fórum hennar.

María birtir reglulega girnilegar uppskriftir á vefsíðu sinni paz.is

Exótískur fiskréttur

1 glas af grófum grjónum á móti 2 dl af vatni (ATH þurfa 30-45 mínútna suðu)

Salt, sítrónusafi og þurrkuð steinselja til að krydda grjónin

800-1000 g ýsa eða þorskhnakkar

1 lítil dós ananas

1/2 gul eða appelsínugul papríka

15 g kókósflögur eða kókósmjöl

1 stór dós kotasæla

1 dós sýrður rjómi með graslauk (þessi í grænu dollunum)

Smá búnt af ferskum graslauk

2 msk hunang

3 msk sætt sinnep

Rifinn ostur

Oggupons papríkuduft

salt og pipar

Dásamleg sæt sinnepssósa með graslauk er svo borin fram með réttinum.

Byrjið á að sjóða grjónin og saltið, setjið sítrónusafa og þurrkaða steinselju út á eftir smekk.

Þegar grjónin eru soðin setjið þau þá í botninn á eldföstu móti.

Raðið svo ýsubitunum yfir og saltið og piprið.

Skerið svo ananas og papríku í litla bita og dreifið yfir ýsuna ásamt kókósflögunum.

Smyrjið svo næst kotasælunni yfir allt saman.

Næst er svo að gera sinnepssósuna með sýrða rjómanum, hunanginu og sæta sinnepinu.

Klippið svo smá ferskan graslauk út í ef þið villjið og hrærið sósunni vel saman.

Hellið sinnepssósunni yfir kotasæluna og dreifið rifna ostinum yfir allt heila klabbið.

Getið sett ferskan mozzarella með líka sem er mjög gott.

Gott er svo að setja oggupons af papríkudufti yfir ostinn.

Hitið réttinn í ofni við 200 C°blástur í 35 mínútur.

Gott er að láta réttinn standa og blása aðeins úr sér í 10 mínútur áður en hans er neytt.