Spennusagnaverðlaunin Svartfuglinn voru afhent í fyrsta sinn í dag. Eva Björg Ægisdóttir, 29 ára þriggja barna móðir með meistarapróf í hnattvæðingu, hlaut verðlaunin fyrir bók sína Marrið í stiganum.

Bókin kom út í dag en Eliza Reed forsetafrú afhenti Evu Björgu verðlaunin. Svartfuglsverðlaunin eru ætluð höfundum sem hafa ekki áður sent frá sér glæpasögu.

Rithöfundarnir Yrsa Sigurðardóttir og Ragnar Jónasson stofnuðu til verðlaunanna í samvinnu við útgefanda sinn, Veröld. Þau skipuðu einnig dómnefnd ásamt Bjarna Þorsteinssyni, útgáfustjóra Veraldar.

Í áliti dómnefndar um bókina segir meðal annars: „Sagan er grípandi og spennandi samhliða því að veita innsýn í myrkan og sáran veruleika. Fléttan er fagmannlega unnin, söguþráðurinn sterkur og sögulokin koma lesandanum á óvart.“

Verðlaunin nema 500.000 krónum auk hefðbundinna höfundarlauna. Sigurvegaranum býðst einnig samningur við umboðsmanninn David H. Headley en tímaritið Bookseller útnefndi hann sem einn af 100 áhrifamestu mönnum breskrar bókaútgáfu árið 2015.