Eurovision-keppnin í ár fer fram í Expo-höllinni í Tel Avív sem hér í Ísrael er kölluð Ganei HaTaarucha. Hún rúmar um 7.300 manns. Höllin er í norðurhluta borgarinnar og er íslenski hópurinn um 25 mínútur að keyra þangað frá hótelinu. Leiðin er ákaflega falleg, liggur meðfram strandlengjunni og í gegnum Yarkon Park. Það tekur aðeins um 35 mínútur að hjóla þangað, en hjólreiðar eru mjög vinsælar hér í Tel Avív.

Þjónustuborðið þar sem sjálfboðaliðar eru hjálpsamir við gesti og gangandi.

Borgin hefur gert 70 kílómetra af hjólastígum og þeim fjölgar stöðugt. Þá er hægt að leigja sér rafmagnshlaupahjól sem er nánast vinsælla en fjölmargir þeysa um göturnar á þessum hjólum.

Keppnishöllin er hönnuð af Aryeh Elhanani og var hún vígð árið 2015. Árið 2010 var gamla höllin, sem var byggð árið 1959, rifin og hafist handa við að reisa nýja. Hér hafa engar smástjörnur stigið á svið: Iggy Pop, Nine Inch Nails, Thirty Seconds to Mars, Lady Gaga, Pitbull, David Guetta, Avicii, Megadeth, Moby, Suede og síðust en ekki síst Roxette.

Ingólfur Grétarsson, sérlegur útsendari Fréttablaðsins, tyllir sér á trébekk í höllinni með einn ískaldan ísraelskan bjór sem slekkur allan þorsta í hitanum í Tel Avív. FRÉTTABLAÐIÐ/BENEDIKT

Í lok apríl var Evrópumótið í júdó haldið í höllinni og nánast um leið og Eurovision-hurðinni verður skellt aftur hefst ráðstefnan Security Israel sem er, miðað við kynningarmyndir hér í höllinni, engin grínhátíð. Þar eru byssur og tölvur og fingraför í forgrunni og fátt um grín.

Sviðið er hannað af Florian Wieder en hann kom einnig nálægt sviðshönnun söngvakeppninnar árin 2011, 2012, 2015, 2017 og 2018. Þetta er einhvers konar demantur með áhorfendasvæði fyrir framan. Í höllinni eru átta salir og 20 ráðstefnusalir. Blaðamannaherbergið er gríðarlega stórt og þar er fínasta stemning og stuð.

Ingólfur mætir til vinnu. Á skjánum sést Hatari á sviðinu í keppnishöllinni.

Veðrið í Tel Avív hefur verið með besta móti. Um 25 gráður mæla snjallsímarnir en það er eins og hitinn sé um 50 gráður þegar sólin hellir geislum sínum yfir okkur. Loftkælingin í höllinni er keyrð á fullu og kvarta blaðamenn sáran yfir kulda – sem er hálf öfugsnúið.

Vinnuaðstaða fyrir fjölmiðlamenn er til fyrirmyndar. Hér er góð nettenging og margir metrar af framlengingarsnúrum sem er mikilvægt. Hér er hægt að fá vatn ókeypis en fyrir bjór og mat þarf að borga sem flestir gera með glöðu geði enda er maturinn hérna í Tel Avív algjörlega til fyrirmyndar.

Tel Avív hefur tekið gestum opnum örmum og er borgin í sannkölluðu sólskinsskapi. Heimamenn rétta vitlausum blaðamönnum hjálparhönd.