Við vissum þegar við keyptum húsið að það hafði gengið í gegnum þó nokkrar breytingar. Það var smíðað 1934 og var þá kjallari hæð og ris, svo var byggt við það 1949,“ segir Daníel.

Þá var viðbyggingu bætt við húsið sem var kjallari og hæð en ekki ris. Árið 1957 kviknar svo í húsinu og rishæðin var ekki lengur íbúðarhæf. Rishæðinni var eftir það breytt í geymsluloft. Daníel segir að þau hjónin hafi frá því þau keyptu húsið viljað setja rishæðina upp aftur. Þau höfðu haft fréttir af nágranna sínum í Skerjafirði sem smíðaði nýja hæð á húsið sitt úti í garði, sagaði svo gamla þakið af og sett hæðina ofan á.

Snorri og Trausti tilbúnir að bora.

„Við veltum fyrir okkur þeirri aðferð,“ segir Daníel. „En svo kom í ljós að húsið var svo illa farið eftir eldsvoðann að það hefði líklega aldrei gengið. Eftir að hafa ráðfært okkur við smiði ákváðum við að rífa húsið ofan af steypta kjallaranum og smíða það upp á nýtt.“

Bjuggu í 21 m2 bílskúr

Fjölskyldan, Daníel, Elín og synir þeirra tveir, þá átta og ellefu ára fluttu úr húsinu í júní árið 2016. „Við byrjuðum strax að rífa sjálf, aðallega bara með höndunum og kúbeini. Við fengum hjálp frá góðu fólki. Svo réðum við smiði til að smíða húsið, og klára það að utan,“ útskýrir Daníel. Húsið er núna kjallari hæð og ris. „Við erum að nálgast upprunalegu útgáfuna, nema það var aldrei ris yfir öllu húsinu áður og það vantaði viðbygginguna. Þannig að þetta er eiginlega fjórða útgáfan af húsinu.“

Jólamatur í hálfkláruðu húsi.

Þegar húsið var tilbúið að utan tók við vinna við að gera það íbúðarhæft. „Við höfum verið að smá dunda við að klára það að innan,“ segir Daníel. „Við fengum húsið afhent aftur rétt fyrir jólin 2016. Þá voru smiðirnir búnir að vera að vinna í því í um það bil hálft ár. Við fórum strax að vinna í að innrétta efstu hæðina og gátum flutt inn í hana í apríl 2017.“

Á meðan endurbyggingin á húsinu stóð yfir flutti fjölskyldan í 21 fermetra stúdíóíbúð sem þau höfðu útbúið í bílskúrnum. „Þetta var ágætis lærdómsferli í að lifa í litlu plássi. Ég held að það hafi allir haft mjög gott af því en við vorum samt mjög fegin að komast í húsið aftur.“

Eins og gamalt báru- járnshús að utan

Daníel segir að þau hafi lagt áherslu á að húsið væri óbreytt að utan að mestu leyti. Að það liti út eins og gömlu bárujárnshúsin. En húsið að innan er alveg nýtt. „Við fengum Helga Hafliðason arkitekt til að teikna það fyrir okkur. Herbergjaskipan og allt innan húss var endurhannað.“

Elín á rishæðinni sem er langt kominn þarna

Hjónin eru enn að klára að innrétta húsið. „Þetta tekur náttúrulega sinn tíma,“ segir Daníel. „Þetta eru þrjár hæðir. Við erum búin að gera öll rými hússins nothæf en það er ýmiss konar frágangur eftir. Það á til dæmis eftir að setja gerefti og gluggakistur nánast alls staðar.“

Daníel segist vera að vinna svolítið úti við þessa dagana að klára að ganga frá svölum og smíða pall í garðinum. „Ég hef verið að nýta tímann meðan veður leyfir.“

„Ég held að ég geri þetta ekki oftar,“ segir hann aðspurður. „Að rífa hús og byggja nýtt er ekki eitthvað sem maður gerir oftar en einu sinni á ævinni.“

Svona leit húsið út þegar fjölskyldan keypti það árið 2011.
Húsið var rifið niður að steypta kjallaranum.
Hér er byrjað að byggja fyrstu hæðina.
Húsið að mestu tilbúið að utan.