Í kvöld hefur þriðja serían af þáttunum Með Loga göngu sína í Sjónvarpi símans, en þeir eru í opinni dagskrá. Næstu fimm fimmtudaga fær Logi til sín góða gesti en gestur hans í kvöld er Ásdís Halla Bragadóttir.

„Það eru sex þættir í heildina í seríunni og þeir eru skemmtilega ólíkir. Við byrjum á Ásdísi, það er alveg meiri háttar þáttur og á ábyggilega eftir að vekja mikla athygli. Hennar líf er bara svo áhugavert. Þegar maður sér hana fyrst þá ber hún ekki með sér að hafa upplifað þennan rússíbana sem líf hennar hefur verið. Svo er hún líka svo einlæg,“ segir Logi.

Gamall draumur Loga rættist svo þegar hann fékk loks að taka fótboltakappann Eið Smára Guðjohnsen í ítarlegt viðtal.

„Hann er fótboltahetjan mín, mér fannst æðislegt að fá að gera það. Í því viðtali koma ýmsir hlutir fram sem maður gerði sér ekki grein fyrir um atvinnumannalífið.“

Logi segir marga af viðmælendum seríunnar hafa deilt með honum og áhorfendum hlutum sem áður hafa ekki komið fram fyrir alþjóð.

„Eiginlega deildu þau öll með mér sögum sem þau hafa ekki sagt áður opinberlega. Mér fannst mjög merkilegt að heyra þær og ég held að áhorfendum muni finnast það líka. Þetta er allt fólk sem hefur sinnt sínum störfum fyrir framan alþjóð og maður hefur sett þau í ákveðinn kassa, en svo á þetta fólk sitt líf og sínar tilfinningar. Þau hugsa um og upplifa bara alls konar hluti sem maður gerir sér ekki grein fyrir,“ segir Logi.

Það stendur ekki á svörum þegar Logi er inntur eftir áhugaverðu atviki við gerð þáttanna.

„Það var fyrsti þátturinn sem við tókum upp þar sem ég talaði við Ólaf Ragnar Grímsson. Það var alveg magnað. Þarna opnar hann sig í fyrsta skipti um forsetatíðina sína. Þá vissum við ekki þannig séð hvað við vorum að fara út í. Svo sat hann bara með okkur þarna, forseti til tuttugu ára, og sagði okkur allt mögulegt sem aldrei hafði komið áður fram. Sem er í sjálfu sér alveg ótrúlegt.“

Hann segir mörg af viðtölunum engu síður eftirminnileg.

„Það myndast ákveðin nánd þegar þú situr með einhverjum í klukkutíma. Það er eins og það sé enginn þarna nema ég og viðmælandinn þótt það sé auðvitað fullt af tökuliði á staðnum. Þetta er svo skemmtilegt. Svo er þetta allt öðruvísi en það sem ég hef verið að gera áður. Þegar maður er að stjórna spjallþætti, þá hefur maður gestinn í stólnum í kannski 8-10 mínútur. Maður er alltaf að reyna að halda þræði, viðtalinu gangandi og fara með viðmælandann á einhvern stað sem þú vilt að hann fari á. Svo auðvitað líka að fíflast og halda þessu skemmtilegu. Þarna eru allt aðrar reglur, lengri tími og það myndast miklu meiri dýpt og nánd. Fólk opnar sig með hluti sem það gerir alls ekki dagsdaglega.“