Í Hlíðarfjalli er sannkölluð skíðaparadís rétt við bæjardyr Akureyrar með frábærri aðstöðu til skíða- og snjóbrettaiðkunar og í febrúar verður opnuð ný og glæsileg skíðalyfta. Í Hlíðarfjalli er starfræktur skíðaskóli fyrir fólk á öllum aldri og hægt er að leigja sér nýjan og góðan búnað, svo allir geta komið og notið aðstöðunnar.

„Þetta er skíðasvæði allra landsmanna, hingað kemur fólk víðs vegar af landinu til að skemmta sér á skíðum og snjóbrettum,“ segir Guðmundur Karl Jónsson, forstöðumaður Hlíðarfjalls. „Alla jafna er opið hjá okkur frá því í desember og fram í lok apríl, en það hafa reyndar verið svo mikil læti í veðrinu að undanförnu að í ár opnuðum við ekki fyrr en 19. desember.“

Bylting í skíðamennsku

„Í Hlíðarfjalli er meiri fjölbreytileiki í brekkum og meira snjóöryggi en víðast annars staðar,“ segir Guðmundur. „Við erum með snjóframleiðslu til að tryggja að það sé oftar nægur snjór í brekkunum okkar, sem gerir lífið léttara.

Við höfum líka verið að setja upp nýja skíðalyftu. Hér var toglyfta sem dró fólk upp á fjallið en við höfum verið að vinna að því að setja upp fjögurra sæta stólalyftu sem fer bæði hærra upp í fjallið og býr til skemmtilegri skíðaleiðir þar sem hún endar,“ segir Guðmundur. „Hún er komin upp en við erum enn að klára að ganga frá henni og ætlum að vígja hana 15. febrúar. Þessi lyfta á eftir að vera bylting í skíðamennsku landsmanna!“

Skóli og góð búnaðarleiga

„Í Hlíðarfjalli hefur líka verið rekinn skíðaskóli fyrir börn og fullorðna í yfir 20 ár, svo þar hefur safnast upp mikil reynsla. Þangað getur fólk komið og fengið kennslu á skíði og snjóbretti,“ segir Guðmundur. „Kennsla fyrir börn fer fram um helgar og á tyllidögum og þá geta þau komið hingað milli klukkan 10 og 14 og skíðað og fengið pitsu í hádeginu. Þetta er mjög vinsælt hjá krökkunum. Fullorðnir geta aftur á móti fengið einkakennslu hvenær sem þeim hentar.

Svo erum við líka með stóra og öfluga skíðaleigu fyrir fólk á öllum aldri þar sem boðið er upp á mikið úrval af skíðum og snjóbrettum. Hún gerir það að verkum að það er hægt að mæta bara og leigja nýjan og góðan búnað,“ segir Guðmundur. „Það er því engin þörf á að eiga búnað til að koma í Hlíðarfjall og prófa nýju lyftuna eða fá smá kennslu.“

Mikið fjör í vetrarfríinu

„Vetrarfrí eru orðin fastur liður í tilveru Íslendinga og það er mjög algengt að fjölskyldur nýti þau til að gera eitthvað saman,“ segir Guðmundur. „Margir koma til Akureyrar og fara á skíði í vetrarfríinu, enda hefur það marga kosti. Hér er fjölbreytileiki í brekkum og öflugur skíðaskóli og skíðaleiga svo hér er tækifæri til að upplifa útiveru og gera eitthvað skemmtilegt með allri fjölskyldunni.

Auk þess er mikið um að vera á Akureyri á vetrarfrístímabilinu, sem er frá því seint í febrúar og fram í byrjun mars. Það verða tónleikar og listviðburðir og hér er mjög mikil þjónusta, veitingastaðir og frábær sundlaug,“ segir Guðmundur. „Það er því þægilegt fyrir þá sem eru vanir þéttbýlisþjónustu að koma hingað og njóta hennar en hafa um leið greiðan aðgang að sveitinni.

Nýja skíðalyftan á eftir að lyfta aðstöðunni í Hlíðarfjalli á nýtt plan og það er alveg upplagt að koma til Akureyrar í vetrarfríinu og njóta frábærrar aðstöðu og góðrar þjónustu í fjölskylduvænu umhverfi,“ segir Guðmundur.

Guðmundur segir að Hlíðarfjall bjóði upp á mikinn fjölbreytileika í brekkum, meira snjóöryggi en víða annars staðar, frábæran skíðaskóla og leigu á gæða skíðabúnaði. FRÉTTABLAÐIÐ/AUÐUNN
AUKA MYND SEM GÆTI VERIÐ FORSÍÐA EÐA MYNDIN AF HONUM Á S. 2 EF HINAR ERU EKKI NÓGU GÓÐAR
Það verður mikið um að vera á Akureyri í vetrarfríinu svo þangað er tilvalið að fara í fríinu til að njóta frábærrar aðstöðu og góðrar þjónustu í fjölskylduvænu umhverfi. FRÉTTABLAÐIÐ/AUÐUNN
Guðmundur segir að nýja stólalyftan verði vígð 15. febrúar og hún eigi eftir að vera bylting í skíðamennsku landsmanna. FRÉTTABLAÐIÐ/AUÐUNN
Í Hlíðarfjalli hefur verið skíðaskóli fyrir börn og fullorðna í yfir 20 ár. Þangað getur fólk komið og lært á skíði og snjóbretti. FRÉTTABLAÐIÐ/AUÐUNN
Á skíðaleigunni er boðið er upp á mikið úrval af bæði skíðum og snjóbrettum fyrir börn og fullorðna á öllum aldri. FRÉTTABLAÐIÐ/AUÐUNN
Hlíðarfjall býður upp á tækifæri til að upplifa útiveru og gera eitthvað skemmtilegt með allri fjölskyldunni. FRÉTTABLAÐIÐ/AUÐUNN