Erla Þorsteinsdóttir söngkona er látin 89 ára að aldri. Hún lést á hjúkrunarheimili í Holbæk Danmörku þann 25 september. Hún er hvað þekktust fyrir að syngja lagið Þrek og tár með Hauki Mortheins, og rokklagið Vagg og velta, sem var bannað í Ríkisútvarpinu í sínum tíma.

Þetta kemur fram í tilkynningu frá fjölskyldu Erlu, en þar er fjallað um ævi hennar. Erla var kölluð lævirkjaröddina, en söngferill hennar spannaði einungis fimm ár. Hún hætti að syngja 26 ára gömul til að sinna eiginmanni sínum og fjölskyldu.

Eiginmaður Erlu var Poul Dancell, sem lést árið 1989. Saman áttu þau fjögur börn Paul, Evu Ingibjörgu, Stefan Thorstein og David Konrad. Synirnir þrír eru allir búsettir í Danmörku en dóttirin býr í Hollandi.

„Erla fæddist á Sauðárkróki 1933 og hóf snemma að syngja og leika á gítar á heimaslóðum en gítarinn hafði hún fengið í fermingargjöf. Átján ára fluttist hún til Danmerkur til að starfa við þjónustu en söngferill hennar hófst mjög snögglega og fyrir alvöru er henni bauðst að syngja og leika á gítar í dönskum útvarpsþætti snemma árs 1954,“ segir í tilkynningu fjölskyldunnar.

Fram kemur að í kjölfarið hafi fjölmörg tækifæri boðist hjá Erlu og fór hún að syngja inn á plötur. Í tilkynningunni er minnst á lögin Þrek og tár, Litli tónlistarmaðurinn, Kata rokkar, og Vagg og velta.

„Þrátt fyrir að afkasta miklu spannar ferill Erlu ekki nema rétt um hálfan áratug, sá tími dugði henni þó vel til að gera hana af einni ástsælustu söngkonu landsins og víst er að síðari tíma kynslóðir þekkja tónlist hennar enn í dag,“ skrifar fjölskylda hennar.

Þá er minnst á að fjöldi tónlistarfólks hafi endurgert lög Erlu, til að mynda Björk Guðmundsdóttir á plötunni Gling gló. Auk þess er minnst á að árið 2000 var gefinn út safnplata með lögum Erlu sem bar nafnið Stúlkan með lævirkjaröddina.

Fréttablaðið/Aðsend
Fréttablaðið/Aðsend