Rúnar Sigurðsson, framkvæmdastjóri Svar, segir að bókhald fyrirtækja sé alltaf að færast meira inn í hinn rafræna heim í gegnum skýjalausnir. „Lausnir okkar eru rafrænar og sjálfvirkar. Enginn pappír því fylgiskjöl og reikningar berast rafrænt og sjálfkrafa inn í bókhaldið auk allra samskipta við bankana. Margir hafa beðið eftir pappírslausum viðskiptum í mörg ár og nú er það loksins orðið að veruleika,“ segir hann. Uniconta er eitt fullkomnasta en jafnframt einfaldasta og hagkvæmasta bókhaldskerfi í heimi að mati Rúnars.

Rúnar segir að Svar hafi upphaflega verið síma- og fjarskiptafyrirtæki. Með breyttum heimi og miklum tækniframförum hafi það fært sig einnig yfir í bókhaldskerfi og sérlausnir. „Við byggjum á 37 ára grunni,“ segir Rúnar sem stofnaði Tæknival og BT og rak til fjölda ára. „Nútíma bókhaldskerfi spara fyrirtækjum mikla fjármuni og vinnu. Til að lýsa kerfinu á einfaldan hátt má segja að þegar reikningur eða fylgiskjal kemur inn í bókhaldið sem pdf- eða XML-skjal sendum við það í skönnun og þá fer það inn í bókhaldið sem OCR -textaskjal og tilbúið til bókunar,“ útskýrir Rúnar. „Kerfið lærir hvernig fyrirtækið bókar á bókhaldslykla. Eftir að aðsendur reikningur er kominn einu sinni veit kerfið hvernig á að útfæra hann í næsta skiptið. Þetta er í grunninn fjárhagsbókhaldskerfi en ofan á það bætast meðal annars viðskipta- og lánardrottnakerfi, birgða-, framleiðslu- og verkbókhald.

Ein af lausnunum sem Svar er með er Intempus, tímaskráningarkerfi og er samþáttað Uniconta. Það hefur nýst mjög vel til dæmis meðal iðnaðarmanna sem hafa tekið því fagnandi. Einnig tamigo, lausn þar sem hægt er að útbúa vaktafyrirkomulag á einfaldan hátt og hentar því mjög vel þar sem þarf að raða fólki á vaktir. Starfsmennirnir geta síðan fylgst með vöktum sínum í gegnum app. Hægt er að bæta við kerfið ýmsum lausnum eftir því sem hentar viðkomandi fyrirtæki. Einnig er hægt að fá stimpilklukku tengda kerfinu,“ útskýrir Rúnar enn fremur. „Bókhaldið er meira og minna sjálfvirkt og einfaldar því alla vinnu. Uppgjör og áætlun er líka hægt að tengja Uniconta og er það kerfið Toolpack365 sem byggir á viðskiptagreind og birtir uppgjör og samanburð við áætlun.“

Viðskiptavinir hjá Svar fá kennslu á bókhaldskerfið og alla þjónustu sem þarf í kringum það. „Þetta er afar einfalt kerfi sem allir geta lært á og eitt það fullkomnasta sem völ er á. Með þessu kerfi er verið að gera bókhaldið eins sjálfvirkt og mögulegt er til að létta starf bókarans og breyta því. Þegar kerfið er komið í gagnið losnar fyrirtækið við allar póstsendingar því allt fer rafrænt frá því. Það hafa orðið gríðarlegar framfarir á þessu sviði og miklar breytingar sem hafa átt sér stað á stuttum tíma. Uniconta er orðið leiðandi fyrirtæki á sínu sviði og það má nefna að í Danmörku eru yfir sjö þúsund fyrirtæki sem nota það. Þau eru orðin nokkur hundruð hér á landi,“ segir Rúnar en það var Daninn Erik Damgaard sem hannaði Uniconta. Erik er jafnframt hönnuður Concorde XAL og Dynamics AX og er mjög þekktur í bókhalds og viðskiptaheiminum. Uniconta tengist við launakerfi og afgreiðslukerfi fyrir verslanir og veitingastaði, einnig er hægt að tengja það vefverslun, Unishop. Núna er kerfið notað í 25 löndum víðs vegar um heiminn. Greitt er mánaðargjald fyrir notkun og allt innifalið í því, hýsing, uppfærslur og allt að klukkutíma þjónusta á mánuði frá Svar.

Ráðgjafar hjá Svar aðstoða fólk við að setja saman bestu lausnirnar en Uniconta er með fjölda viðbótarlausna sem tengjast innbyrðis og spara mikla vinnu. „Ég tel okkur vera þá einu á landinu sem getum boðið svona margar samþættar lausnir,“ segir Rúnar. „Þetta er eina kerfið sem er í skýjalausn og það eina sem er fullkomlega rafrænt og án pappírs. Uniconta er umhverfisvænt, hraðvirkt og þægilegt kerfi,“ segir Rúnar. „Viðskiptavinir okkar hafa verið mjög ánægðir með þetta kerfi og við höfum fengið sterk viðbrögð frá þeim. Bókhaldsmöppur heyra sögunni til þegar fyrirtækið er komið með rafrænt kerfi.“

Til að fá nánari upplýsingar um kerfið er hægt að skoða heimasíðuna svar.is eða hringja í síma 510 6000.