Nestiskarfa Kristínar er vel búin. FRÉTTABLAÐIÐ/VALLI

Kristínu er margt til lista lagt og svo er hún líka með græna fingur. Hún ræktar ýmiss konar góðgæti heima og nú þegar tími uppskeru er upprunninn er Kristín byrjuð að töfra fram sælkerakræsingar til að njóta síðsumars. Kristínu þykir fátt skemmtilegra en að bera fram pikknikk-krásir sem gleðja bæði augu og bragðlauka á góðviðrisdögum og þá skipta litlu hlutirnir máli.

„Ég er með lítinn matjurtagarð þar sem ég rækta grænkál, rabarbara og spínat og prófa á hverju ári nýjar matjurtir. Ég er líka með jarðarberjaturn á svölunum og rifsberja- og sólberjarunna í bakgarðinum. Auðvitað borðum við mest af grænmetinu brakandi ferskt yfir sumarið en þegar ég dett í haustgírinn finnst mér mjög gaman að gera sultur, hlaup, sýrt grænmæti, síróp og ýmislegt fleira gott. Rifs- og sólberin eru ekki tilbúin þannig að ég er ekki byrjuð á að leika mér með þau í ár,“ segir Kristín.

Hvað er yndislegra en að taka fram nestiskörfuna og njóta góðgætis á nestisteppi í náttúrunni? FRÉTTABLAÐIÐ/VALLI

Fullkomið jafnvægi súrs og sæts

Kristín deilir með lesendum uppskrift að einni af sínum uppáhaldssultum sem er rabarbara- og jarðarberjasulta sem hún gerir alltaf á haustin.

„Blanda af rabarbara og jarðarberjum nær svo dásamlegu jafnvægi milli súrs og sæts. Svo geri ég líka alltaf grænkálspestó sem er sérstaklega ljúffengt með nýbökuðu brauði,“ segir Kristín dreymin á svip.

Hún lætur hér fylgja með uppskrift að einfaldri rabarbaraböku.

„Þessi baka virkilega poppar með vanilluís. Uppskriftin að fyllingunni er heimatilbúin en toppurinn er klassísk ensk uppskrift úr einni af krúttlegu matreiðslubókunum sem National Trust gefur út í Bretlandi.“

Allt smakkast vel úti í guðs grænni náttúrunni og ekki verra þegar kræsingarnar eru bornar svona fallega fram. FRÉTTABLAÐIÐ/VALLI

Rabarbara- og jarðarberjasulta

Uppskrift fyrir eina stóra krukku.

2 bollar rabarbari í bitum

2 bollar jarðarber

1 bolli sykur

Allt sett í pott á meðalhita og látið malla í 45-60 mínútur, hrært í við og við. Suðutími fer eftir því hvernig áferð á sultunni fólk vill hafa, en Kristínu finnst best að hafa smá bita í henni.

Rabarbarasulta og grænkálspestó Kristínar er gómsætt og girnilegt. FRÉTTABLAÐIÐ/VALLI

Grænkálspestó

12 grænkálsblöð, stilkur skorinn frá

⅓ bolli pistasíuhnetukjarnar

1 hvítlauksrif

2-3 msk. ólífuolía

50 g parmesan

Salt eftir smekk

Kristín setur grænkálið í sjóðandi vatn og lætur sjóða í 30-45 sekúndur þar til það er orðið fallega grænt. Kælir svo grænkálið og kreistir vatnið frá. Þá rífur hún parmesanostinn í blandara og bætir við hinum hráefnunum og maukar þar til góðri áferð er náð. Smakkað til með salti í lokin.

Rabarbarabaka Kristínar er gómsæt og hentar vel í lautarferð á góðum degi. FRÉTTABLAÐIÐ/VALLI

Rabarbarabaka

Uppskrift fyrir 22-24 cm form

Fylling

3 bollar rabarbari í 2 cm bitum

4 msk. hunang

1 msk. malaður engifer

Allt sett í pott og látið malla í 5-6 mínútur.

Toppur

100 g hveiti

50 g haframjöl

120 g hrásykur

1 tsk. kanill

100 g bráðið smjör

Hitið ofn í 180 °C. Þægilegast er að byrja á að gera toppinn, þá nær deigið að kólna meðan fyllingin er gerð. Blandið öllum þurrefnum saman. Hrærið svo smjörinu vel saman við með gaffli og kælið. Blandan á að vera nokkuð gróf.

Setjið öll hráefni í fyllinguna í pott og látið malla í nokkrar mínútur. Færið fyllinguna svo yfir í eldfasta mótið og myljið toppinn yfir.

Bakið í ofni við 180 °C í 25 til 30 mínútur, þar til að bakan er orðin fallega gyllt.