Haustið kallar á bragðgóðar og heitar súpur sem ylja og þessi dásamlega Taco súpa gerir það svo sannarlega. Heiðurinn af þessari ekta Taco súpu og holla nachosi er enginn önnur en María Gomez sælkeri með meiru sem heldur úti síðunni paz.is

„Þessi súpa var að mínu mati alveg stórkostlega góð. Eins og með flestar súpur var hún jafnvel enn betri daginn eftir. Það er ekkert mál að gera hana og tekur aðeins örlitla stund. Auk þess þá er hún holl sem skemmir ekki fyrir,“ segir María en hún hefur mikið dálæti af því að reyna að útbúa bæði ljúffenga og holla rétti sem bragð er af.

Að sögn Maríu er ómissandi að hafa nachos með súpunni og bakaði hún sitt eigið nachos því hún vildi hafa það næringarríkt og hollt. Uppistaðan í nachoinu eru fræ, maísmjöl og ólífuolía, svo það getur ekki verið annað en næringarríkt og hollt.

Með súpunni er algjört lykilatriði að bera fram nachos og enn betra að vera líka með avókadó, sýrðan rjóma og rifinn ost. Meðlætið fullkomnar máltíðina.

FBL Taco súpa & Heimagert nachos 2.jpeg

Taco súpa

2 msk. Muna Ólífuolía

1 stk. laukur smátt skorinn

3 stk. marinn hvítlauksrif

500-600 g nautahakk

Salt og pipar eftir smekk

2 kúfullar msk. af MUNA tómatpúrru

1 rífleg msk. taco krydd að eigin vali

1 dós maísbaunir (safinn með)

1 dós maukaðir tómatar

1 dós nýrnabaunir (safinn með)

1 msk dökkt MUNA agavesíróp

1 dós sýrður rjómi með graslauk

1 tsk. hot wing sósa

2 msk. grænmetiskraftur í duftformi

2 bollar soðið vatn

FBL Tacosúpa & heimagert nachos 3.jpeg

Nachosið hennar Maríu er meinhollt og einfalt að gera./Ljósmyndir María Gomez.

Nachos að hætti Maríu

35 g sesamfræ

35 g hörfræ

20 g graskersfræ

45 g sólblómafræ

2 dl maísmjöl (glútenlaust fæst í Fræinu og Hagkaup. ATH ekki sama og Maizenamjöl þetta er frá merkinu Ma Vie)

½ tsk. borðsalt

½ dl Extra Virgin Ólífuolía frá MUNA

2 ½ dl sjóðandi heitt vatn

Gróft salt

Þurrkaður graslaukur

Taco Súpa

  1. Hitið olíuna í potti og bætið lauk og hvítlauk saman við og mýkjið í olíunni.
  2. Þegar laukarnir eru orðnir mjúkir setjið þá nautahakkið út á og saltið og piprið.
  3. Þegar hakkið er orðið ljósbrúnt að lit setjið þá tómatpúrru og nacho krydd út á og hrærið vel inn í hakkið.
  4. Bætið næst við maukuðu tómötunum og baununum og hellið safanum af báðum baununum með út í súpuna.
  5. Hrærið saman og bætið grænmetis soðduftinu og vatninu saman við ásamt agavesírópinu og hot wing sósunni og hrærið saman.
  6. Bætið svo sýrða rjómanum út í og látið sjóða saman í 15-20 mínútur.
  7. Berið fram með avókadó, rifnum osti og sýrðum rjóma ásamt nachos til að mylja út í.

Nachos

  1. Setjið Fræin í blandara eða matvinnsluvél og malið þar til verður að fínu dufti.
  2. Setjið svo fræin borðsaltið og maísmjölið saman í skál og hrærið saman með skeið.
  3. Setjið því næst olíuna og hrærið hana aðeins inn í blönduna.
  4. Sjóðandi vatninu er svo hellt yfir að lokum og allt hrært saman.
  5. Setjið deigið á bökunarpappír og svo annan bökunarpappír ofan á.
  6. Byrjið á að fletja það aðeins út með flötum lófa og notið svo kökukelfi til að fletja deigið út í ferning sem er jafnstór og bökunarpappírinn.
  7. Takið næst pappírinn ofan af og setjið deigið á bökunarplötu með pappírnum sem var undir. Best er að draga pappírinn upp á plötuna, það þarf að fara varlega að deigið leki ekki til.
  8. Saltið svo yfir allt með grófu salti og stráið þurrkuðum graslauk yfir. Ekki vera feiminn við saltið og graslaukinn en mér finnst best að hafa vel af því. Passið þó að salta ekki heldur of mikið.
  9. Að lokum er gott að skera í deigið með pizzaskera nacholagaða þríhyrninga.
  10. Bakist í 55 mínútur við 150 °C.

Berið fram á fallegan hátt og njótið.

FBL Tacosúpa & heimagert Nachos 4.jpeg