Hér er frábær tillaga að ekta sunnudagsmat sem allir steikar- og kartöfluunnendur munu elska, enda er hér á ferðinni grilluð nautalund og bakaðar kramdar kartöflur sem bráðna í munni með ljúffengri rauðvínssósu.

Berglind Hreiðars matar- og kökubloggari á Gotterí og gersemar á heiður af þessari samsetningu af sunnudagsmat sem á vel við á fallegu haustkvöldi.

Sunnudagsmatur 2.jpeg

Sunnudagsmatur á haustkvöldi

Fyrir 4-6

Grilluð nautalund

800 g nautalund (fínar nautalundir fást í Bónus)

150 ml soyasósa

Smá smjör

Svartur pipar eftir smekk

Snyrtið lundina og marínerið hana í sojasósunni í um 30-45 mínútur. Grillið síðan á vel heitu grilli þar til óskuðum kjarnhita er náð, við tökum okkar af grillinu í um 52-55°C og leyfum að standa í um 10 mínútur áður en skorið er. Þegar lundin er að verða tilbúin má nudda hana aðeins með smjöri og síðan pipra hana eftir að hún er tekin af grillinu.

Sunnudagssósan.jpeg

Rauðvínssósa

300 g kastaníusveppir (má sleppa ef vill)

40 g smjör

2 hvítlauksrif

150 ml rauðvín

350 ml vatn

2 x TORO rauðvínssósa (duftið)

1 msk. fljótandi nautakraftur

1 tsk. saxað ferskt timian

Salt, pipar, cheyenne pipar

Skerið sveppina gróft niður og steikið upp úr smjöri við meðalháan hita. Rífið hvítlauksrifin saman við þegar sveppirnir fara aðeins að mýkjast og kryddið eftir smekk með salti og pipar.

Þegar allur safi hefur gufað upp af sveppunum má hækka hitann, hella rauðvíninu saman við og leyfa því að sjóða stutta stund, lækka síðan hitann og leyfa því aðeins að gufa upp. Bætið þá vatninu saman við og báðum sósupökkunum, náið aftur upp suðu og lækkið hitann síðan vel, hrærið reglulega í sósunni og leyfið henni að malla. Bætið timian við og kryddið til með nautakrafti, cheyenne pipar, salti og pipar.

Kramdar kartöflur 5.jpeg

Kramdar kartöflur

Um 900 g kartöflur (nýjar íslenskar)

Ólífuolía

Salt, pipar, hvítlauksduft

Hitið ofninn í 210°C. Sjóðið kartöflurnar fyrst, kælið þær aðeins og penslið ofnskúffu með ólífuolíu. Raðið kartöflunum í ofnskúffuna og kremjið niður með kartöflustappara/spaða.

Penslið kartöflurnar næst með ólífuolíu og kryddið eftir smekk. Bakið í 20-25 mínútur eða þar til þær verða aðeins stökkar að utan.

Bakaður hvítlaukur

Heill hvítlaukur

Ólífuolía

Flysjið allt það lausa utan af hvítlauknum. Skerið neðan af honum um ½ cm til að opna vel fyrir alla geira. Setjið inn í álpappír, skvettið smá ólífuolíu yfir, lokið inni í álpappír og bakið við 210°C í um 40 mínútur.

Verið ykkur að góðu.