Dögg hefur sniðgengið kjöt og flestar dýraafurðir í nokkur ár og deilir með lesendum uppskrift að meinhollum en sérlega ljúffengum tófúrétti. „Tófú vafðist lengi fyrir mér og ég var búin að reyna oft að elda það en það varð alltaf svo vont hjá mér. Svo ég fór eiginlega bara í fýlu út í tófú. Seinna fór ég að kynna mér tófú betur og las endalaust af ráðleggingum um hvernig væri best að elda það, sem varð til þess að ég tók það aftur í sátt. Tófúið var ekki vandamálið heldur ég, sem var ekki búin að kynna mér það nægilega vel. Núna er ég alveg hætt að vera í fýlu út í tófú,“ segir Dögg.

Fylgjandi uppskrift segir Dögg að sé hrærigrautur af mörgum uppskriftum sem hún hefur prófað. „Ég datt niður á þessa samsetningu fyrir stuttu og fannst hún koma rosalega vel út. Mér finnst þetta algert helgarnammi en þetta er líka ótrúlega hollur, góður og næringarríkur réttur. Þetta er virkilega bragðgott og djúsí, alls ekki flókin uppskrift og einfalt að útfæra hana eins og hver vill.“ segir Dögg.

„Núna nota ég tófú reglulega í súpur og svo hef ég verið að prófa að nota það í staðinn fyrir kjúkling í uppskriftum sem ég notaði þegar ég borðaði kjöt. Núna er ég mjög spennt að prufa mig áfram með tófú á grillið í sumar.“

Brakandi tófú með hnetusmjörssósu, salati og núðlum

Stökkir tófúbitar

  • 1 kubbur firm tófú pressað
  • 3-4 msk. sojasósa
  • Safi úr hálfri sítrónu
  • 1 tsk. sæta (síróp/hunang/púðursykur …)
  • 1 msk. Sriracha sósa
  • 1 tsk. hvítlauksduft
  • ½ tsk. engiferduft
  • smá klípa af chilidufti (ef vill)
  • 5 msk. maíssterkja
  • Sesamfræ eftir smekk
  • Olía

Til að pressa tófúkubbinn er hann vafinn inn í viskastykki eða taubleyju og eitthvað þungt og stabílt sett ofan á. Leyfið að pressast í um 45-60 mínútur. Hrærið saman maríneringuna: sojasósa, sítrónusafi, sætan, Sriracha, hvítlauks-, engifer- og chiliduft. Smakkið til og bætið við Sriracha ef þið viljið hafa sterkara, en sætu ef þið viljið milda bragðið. Skerið tófúkubbinn í munnbitastóra kubba og marínerið í 20-30 mínútur. Takið tófúið frá og fargið maríneringunni. Ef of mikið af henni fer með í næsta skref þá verður tófúið ekki stökkt. Setjið tófúkubbana í hreinan ziplock poka með maíssterkjunni og sesamfræjunum. Veltið um þar til þeir eru allir húðaðir. Á meðan skal hita olíu á pönnu. Ekki mikið meira en matskeið. Þegar olían er orðin heit skal setja kubbana varlega á pönnuna og steikja í um 3 mínútur á hverri hlið uns þeir verða örlítið gulir.

Tófúbitarnir eru dásamlega stökkir og núðlurnar smellpassa með salatinu og hnetusmjörssósunni. Kóríander og lime setur svo punktinn yfir i-ið.

Hnetusmjörssósa

  • 30-40 ml vatn
  • 2 msk. hrísgrjónaedik (eða hvítvínsedik)
  • 1½ msk. hnetusmjör
  • 1 msk. sojasósa
  • 1 cm af fersku engifer
  • 2 tsk. Srirachasósa
  • 1 tsk. sesamolía
  • Ristaðar hnetur eftir smekk

Öllu nema hnetunum er blandað saman í matvinnsluvél/blandara/með töfrasprota. Best er að byrja á að setja 30 ml af vatni og bæta svo við til að þynna ef þarf. Til að fá smá bit í sósuna er gott að bæta við söxuðum og ristuðum hnetum/möndlum og hræra út í eftir á. Hægt er að gera barnvænni útgáfu af sósunni með því að sleppa Sriracha og bæta við 1-2 tsk. af kókosmjólk.

Salat

  • Spínat eftir smekk
  • ½ lítill haus ferskt rauðkál
  • 3-4 gulrætur
  • 1/2 rauðlaukur
  • ½ agúrka
  • 1/3 pakki vermicelli-núðlur
  • smámaís eftir smekk

Eldið vermicelli-núðlur eftir leiðbeiningum á pakka. Saxið spínat, skerið rauðkál í strimla, rífið gulrætur í rifjárni, skerið smámaís í bita, saxið rauðlauk smátt og fræhreinsið gúrku og sneiðið hana með flysjara. Blandið grænmetinu saman í skál ásamt hnetusósunni.

Berðu fram

  • kóríander
  • Baunaspírur
  • Lime
  • Saxaðar salthnetur

Setjið vermicelli-núðlur í skál. Næst kemur salatblandan. Svo eru tófúbitarnir settir ofan á og allt toppað með baunaspírum, kóríander og söxuðum salthnetum. Gott er að kreista lime yfir.