Davíð segir að fólk borði oft yfir sig af þungum jólamat með kartöflum, sósu og öðru meðlæti. „Afgangarnir þurfa ekki að vera það líka,“ segir hann. „Fólk á oft og tíðum eitthvað eftir af hamborgarhrygg og ananas þannig að ég ákvað að hafa hann með sem gefur góða ávaxtasætu í réttinn. Það getur verið svolítið misjafnt hversu mikið hryggurinn er saltaður og því þykir mér gott að nota svolítið af sýru á móti til að stilla saltið af. Dressingin er súr en fær kjallarabragð frá sojanu. Kimchi er náttúrlega gerjað kál og er einnig súrt í sjálfu sér en gefur gott umami-bragð og smá sterkt bragð,“ segir hann um jólasalatið sem hann gefur hér uppskrift að. „Þetta er hinn fullkomni réttur til að geta sest niður við jólaborðið og nýtt það sem er til í ísskápnum án þess að fá velgju,“ segir hann.

Davíð er veitingastjóri og yfirmatreiðslumaður á Hótel Húsafelli. Þar hefur hann starfað síðan í nóvember á síðasta ári. Einnig er hann þáttastjórnandi og höfundur þáttanna Allt úr engu, sem voru sýndir á Stöð 2 í haust og hægt er að nálgast á Stöð 2 Maraþon. „Þar er ég að leika mér með að nýta það sem fólk á í ísskápnum hjá sér og gefa því nýtt líf,“ segir hann. En er hann duglegur að nýta afganga? „Það eru eiginlega aldrei afgangar hjá mér nema ég geri það viljandi að búa til of mikið. Ef það er eitthvað eftir klára ég það yfirleitt fyrir miðnætti af einhverjum ástæðum. Ef ég geng fram hjá boxi með afgöngum hika ég ekki við að stinga upp í mig einni eða tveimur skeiðum og held svo áfram að gera það sem ég var að gera. Svona gengur þetta yfir kvöldið þangað til allt er búið. Hins vegar er alltaf mikið til af grænmeti sem er að eyðileggjast í ísskápnum hjá mér þar sem vinnutíminn gefur mér kannski ekki færi á að elda á hverju kvöldi. Ég á það því til að elda það, varðveita, frysta eða hvað það sem mér dettur í hug til að gefa því nýtt og lengra líf. Þegar Davíð er spurður um uppáhaldsjólamat, svarar hann: „Fjölskylda mín hefur borðað kalkún með fyllingu, sósu og waldorfsalati á jólunum síðan ég fæddist og við höfum ekkert ætlað okkur að hætta því. Ég held þess vegna að kalkúnninn sé mitt uppáhalds en mér finnst samt líka eitthvað kósí við það að borða hangikjöt með uppstúf, rauðrófusalati, laufabrauði og rauðkáli og grænum baunum frá Ora. Það verður að vera Ora. Annars eru ekki jól.“

Grænt salat með hamborgarhrygg, sesam og ananas fyrir um það bil fjóra

Undirbúningstími 15–20 mínútur.

Salatdressingin

Gott að gera daginn áður en virkar líka að neyta samdægurs)

1 msk. fínt saxað engifer

1/4 hvítlauksgeiri – rifinn fínt eða pressaður

1/4 eldpipar – fínt saxað (er einnig hægt að sleppa þar sem það er eldpipar í kimchi)

2 stk. wasabi paste (má sleppa ef fólk fílar ekki wasabi er samt klárlega betra með)

1 stk. lime – safi og fínt rifinn börkur

2 msk. sojasósa – kikkoman helst

2 tsk. ristuð sesamolía eða önnur olía sem hendi er næst

6 msk. ólífuolía 2 tsk. hunang

Topparnir af vorlauknum sem verður notaður í salatið hér á eftir. Setja allt saman í skál og hræra þangað til hunangið og wasabi er búið að leysast upp í vökvanum. Geyma til hliðar á meðan maður græjar restina af salatinu.

Marinerað kínakál

Gott að gera daginn áður en er ekki nauðsynlegt.

1/2 stk. íslenskt kínakál – skorið þvert í 1/2 strimla

2 msk. íslenskt kimchi

10–12 stangir kóríander – saxað gróft

1/4 tsk. fínt salt

Allt blandað vel saman og leyft að marinerast á meðan maður græjar restina af salatinu.

1/2 ferskur ananas – eða það sem er til afgangs frá hamborgarhryggnum, skorinn í þunna strimla eða sneiðar.

1/2 íslensk agúrka, skorin í helminga, svo þvert. Eða í það form sem þig dreymir um á nóttunni.

4–5 stangir vorlaukur – saxaður þvert í þunnar skífur

1/2 poki íslenskt og lífrænt spínat

1/2 poki grænkál – rifið af stönglinum í minni stykki og lagt í vatn í 10–15 mínútur til að gera það stökkara

Það sem til er af afgöngunum af hamborgarhryggnum sem svo er skorinn í þunnar sneiðar eða strimla Svört sesamfræ eftir smekk. Setjið allt saman í stóra plastskál og blandið vel saman. Borið fram í fallegri skál beint á borðið eða í skálum fyrir hvern og einn. Skreytið hamborgarhrygginn með kóríander og ananas og sáldrið smá sesam yfir. Munið að það er alltaf skemmtilegra að borða fallegan mat en þó mikilvægara að hann bragðist vel, þannig að smakkið salatið áður en þið berið herlegheitin fram. Einnig mæli ég með að borða þetta á fallegu jólaborði.

Ps. Ég hef heyrt að þetta sé fáránlega gott daginn eftir líka. Afgangur á afgang ofan.