Árið 2019 var sögulegt í kvennaboltanum á Íslandi þegar Valur varð Íslands- og bikarmeistari og deildarmeistari í handbolta og körfubolta kvenna og Íslandsmeistari í fótbolta kvenna. Svali H. Björgvinsson segir ómælda vinnu og metnað liggja að baki einu mesta afreki Vals frá upphafi sem ólíklegt sé að verði leikið eftir.

Svali er Valsari frá blautu barnsbeini. „Ég er alinn upp í Hlíðunum og Valsheimilið og Valsvöllurinn voru mitt leiksvæði og annað heimili. Eins og oft var á þessum árum þá stunduðu krakkar margar íþróttir og um tíma stundaði ég og æfði allar greinar í Val. Ég kynntist körfubolta í Val sennilega um 10-12 ára aldur, þá var deildin fámenn og ung.“

Óhætt er að fullyrða að Svali hafi kolfallið fyrir körfunni sem hann lýsir sem mikilli listgrein.

„Síðan þá hefur körfubolti og Valur verið stór hluti af mínu lífi og góð tilbreyting frá öðru amstri. Ég hef keppt fyrir og þjálfað alla aldurshópa, karla og konur í Val og hef komið að uppbyggingu Vals sem stjórnarmaður í 25 ár. Ég er menntaður í sálfræði og mannauðsstjórnun og hef verið svo lánsamur að mér hefur verið treyst fyrir mjög skemmtilegum og krefjandi störfum og því hefur Valur og körfubolti alltaf verið ákveðinn griðastaður fyrir huga og líkama. Sú gæfa fylgir mér að kona mín styður þessa ástríðu vel og börnin þrjú eru öll í Val sem einfaldar og dýpkar alla umræðu á heimilinu.“

Jafnrétti snýst um ákvarðanir

Það vakti mikla athygli þegar öll kvennalið Vals sópuðu til sín fjölda verðlauna árið 2019. Svali segir árangurinn meðal annars stafa af áherslum félagsins á jafnréttismál í gegnum tíðina.

„Jafnrétti hefur verið ofarlega hjá okkur í Val lengi og verið virk umræða um það í stefnumótunarumræðum sem ég man eftir allt frá árinu 2000. Jafnrétti er vissulega fyrst og síðast spurning um ákvarðanir frekar en einhver töfrabrögð eða djúpa greiningarvinnu.

Það var því einstaklega ánægjulegt fyrir okkur í Val að ná þeim magnaða árangri að öll kvennalið félagsins verða Íslandsmeistarar á sama ári og handboltinn og körfuboltinn bikarmeistari að auki, með viku millibili. Þannig komu 5 af 6 stóru bikurunum í boltagreinum kvenna að Hlíðarenda það árið. Í mínum huga er þetta eitt mesta afrek Vals frá upphafi og ekki mörg önnur afrek félagsliða sem toppa þetta ár hjá Val. Ég sé ekki fyrir mér að þetta verði leikið eftir,“ segir Svali.

Svali er án nokkurs vafa einn mesti körfuboltaunnandi sem Ísland hefur alið af sér. FRÉTTABLAÐIÐ/ERNIR

Samstaða milli deilda

„Þessu til viðbótar var kvennakörfuboltaliðið valið lið ársins í vali íþróttafréttaritara samhliða vali um íþróttamann ársins 2019, handboltaliðið í öðru sæti. Körfuboltaliðið varð lið ársins hjá Reykjavíkurborg og Margrét Lára íþróttamaður Reykjavíkurborgar. Þarna rann saman öll sú vinna sem leikmenn og félagið hafði lagt á sig lengi. Það er líka von okkar og vissa að þetta afrek sé eitt lóð á vogarskálar um jafnrétti í íþróttum og framþróun kvennaíþrótta á Íslandi,“ segir Svali bjartsýnn.

„Það var líka einstakt að finna samstöðu milli deilda og metnað sem ríkti milli stelpnanna gera þetta ár einstakt. Það var mikil pressa á fótboltastelpunum undir lok sumars að vinna Íslandsmótið, það fannst mér geggjað augnablik. Fyrir okkur sem komum að því að stýra og vinna fyrir félag eins og Val, þá er svo gefandi að sjá ungt fólk ná markmiðum sínum og gleðjast sannarlega. Það þarf ekki meira vítamín þann daginn.“

Mission – ártal á vegginn

Að sögn Svala var þetta ár sérstaklega eftirminnilegt í kvennakörfuboltanum. „Fyrir okkur í körfuboltanum í Val var árið 2019 að því leyti einstakt að þetta voru fyrstu titlar í kvennakörfunni. Ég og fleiri höfum lengi horft á titlavegginn okkar og saknað þess að sjá ekki ártal á veggnum í kvennakörfunni. Við kölluðum þetta verkefni; mission – ártal á vegginn. Körfubolti er yngsta deild Vals, 50 ára, og kvennakörfubolti hefur ekki verið stundaður markvisst í Val nema í um 20 ár. Við vorum afskaplega stolt af að eftir þessari uppbyggingu var tekið og að liðið okkar hafi verið valið lið ársins.“

Svali segist vona að þetta sé minning sem lifi alla tíð með þeim stelpum sem þá voru í liðinu. „Ég veit að fyrir mig og Val var þetta mikil hvatning. Við erum einstaklega stolt af þessu afreki. Hins vegar hefur það komið mér á óvart í þessari umræðu hvað margir, einstaklingar og fyrirtæki, hafa mikinn kraft í að gagnrýna þegar miður gengur, en þessir sömu aðilar og fyrirtæki eru ekki tilbúin að koma að því að styrkja þá sem sannarlega eru að reyna að sinna jafnrétti og uppbyggingu, hjá Val eða öðrum félögum. Því á bak við svona afrek, eins og árið 2019 í Val, er ómæld vinna.“

Móðir allra íþrótta

Ljóst er að Svali er einn mesti körfuboltaunnandi sem Ísland hefur alið af sér en áhugi hans á íþróttinni á sér engin takmörk.

„Sjálfur hef ég mikinn áhuga á íþróttum og tæknilega of mikla ástríðu fyrir körfubolta. Ég er búinn að spila, þjálfa, rannsaka og lýsa körfubolta í rúm 40 ár og daglega sé ég nýja víddir í þessum fagra leik. Fyrir mig er körfubolti jafnvægisstilling og lífsgæði. Fyrir mér er körfubolti móðir allra íþrótta og drottning boltaleikjanna, en ég veit að því eru ekki allir sammála.

En það er mikil uppsveifla með körfubolta á Íslandi og ég skynja að fleiri eru að átta sig á þessari listgrein. Okkur í Val langar að vera hluti af þessari uppsveiflu og leggja okkar til, til að byggja körfubolta upp enn frekar, öllum til heilla,“ segir hann.

„Það magnaða við íþróttir og þá útrás sem við fáum í gegnum íþróttir er að endurgjöfin kemur strax og er miskunnarlaus, sigur eða tap. Gekk planið upp, eða ekki? Á þeirri stundu og í því augnablikinu skiptir sá leikur öllu máli. Það er nánast öllu öðru fórnað, en í stóra samhenginu skiptir hver kappleikur sáralitlu máli. Það er einnig magnað og erfitt að lýsa með orðum, hvað það er gefandi og hugarstillandi að koma að uppbyggingu íþróttafélags, þar sem ungt fólk heimsækir drauma sína og sækir næringu og þroska. Þegar vel tekst til og markmið, stór eða smá nást, og gleðin er óspillt. Þá er markmiði Vals náð og endurgjöfin til okkar sem sinnum starfinu er fullkomin.“