„Draumurinn er að vinna sem sjálfstætt starfandi hönnuður og listamaður í framtíðinni,“ segir Jón Sölvi Walderhaug Eiríksson, nemandi í vöruhönnun við Listaháskóla Íslands (LHÍ). „Starfið gæti tengst hönnun ólíkra hluta, t.d. húsgögnum, klæðnaði eða listaverkum en lífið er ferli og það skýrist allt með tímanum.“

Hann segir að ákvörðunin um að sækja um nám í vöruhönnun hafi verið frekar náttúruleg þróun á því sem hann hafði verið að gera í menntaskóla. „Ég hóf nám í menntaskóla í Noregi, þar sem móðir mín býr, og reyndi við almenna braut. Þegar ég lít til baka þá var ekki fruma í líkama mínum sem hafði áhuga á bóklegum greinum á þeim tíma. Ég eyddi tímanum mínum frekar í að mála málverk en að læra heima.“

Ljósbrúnn pleðurjakki úr Spúútnik, ullarvesti og hvítar buxur frá fatamarkaðinum við Hlemm, hvíta yfirhöfnin er textílprufa sem átti að henda. 80´s skíðaskórnir voru keyptir á fatamarkaði. FRÉTTABLAÐIÐ/EYÞÓR

Eftir fall á fyrsta ári skipti hann um skóla og hóf nám í Kunst, design og arkitektur, þar sem hann blómstraði að eigin sögn. „Þar uppgötvaði ég hönnun og arkitektúr og endaði með því að flytja heim til Íslands eftir ár þar sem ég hóf nám í hönnun og nýsköpun samhliða stúdentsgráðu í Tækniskólanum. Mér gekk vel í skapandi greinum og ákvað í kjölfarið að sækja um nám í vöruhönnun í LHÍ, enda taldi ég á þeim tíma að námið myndi gefa mér mesta svigrúmið til að tjá mig gegnum hönnun. Annars hef ég lært það helst á þessum árum að elta forvitnina og vera ekki hræddur við að gera tilraunir.“

Suprime langermabolur sem vinur hans gaf honum og bolur frá fatamarkaðinum við Hlemm. FRÉTTABLAÐIÐ/EYÞÓR

Þurfum að hugsa öðruvísi

Eftir útskrift langar hann í starfsnám erlendis og vinna hjá hönnuði til að fylgjast með, læra og skilja. „Annars eru svo spennandi hlutir að eiga sér stað í hönnun í dag, þar sem skilgreiningar eru að endurskilgreina sig og nýir heimar eru að verða til daglega. Ég tel það vera vegna þess að við sem samfélag erum loks tilneydd til að hugsa öðruvísi um okkur sjálf og hlutverk okkar á þessari dýrmætu jörð í sambandi við loftslagsmál.“

Bekkur Jóns Sölva í Listaháskólanum heldur sýningu í skólanum laugardaginn 27. nóvember sem stendur til sunnudags. „Sýningin fjallar um regnskóga norðursins. Við ætlum að kynna til leiks stórkostlegan heim þara og þangs á Íslandi og sýna hvað við erum búin að komast að síðan við kynntumst þessari náttúru í ágúst. Hægt er að fylgjast með á Instagram (@product_design_iua).“

Jón Sölvi sýnir okkur nokkrar flíkur úr fataskápnum.

Prjónuð hetta frá ömmusystur hans, stutterma turtleneck frá fatamarkaðinum við Hlemm og köflóttar buxur frá Rauða krossinum. FRÉTTABLAÐIÐ/EYÞÓR

Spurt og svarað:

Hvernig hefur tískuáhugi þinn þróast undanfarin ár?

Ég held að áhugi á tísku hafi alltaf fylgt mér. Mér fannst sem dæmi ótrúlega gaman að fylgjast með gömlum bændum og sveitaklæðnaði þegar ég var barn. Á grunnskólaárum mínum var ég líka oft með litríka kennara. Svo held ég að persónulegur stíll hafi alltaf verið í tengingu við tónlist. Fyrst var það rokk en í dag er ég frekar mikil alæta þegar kemur að tónlist. Fyrir vikið breytist klæðnaðurinn minn á tveggja vikna fresti. Einn daginn er ég í kjól og annan er ég í jakkafötum. Annars finnst mér tíska eða fatastíll vera bara „tribal instinct“ til sýna hver við erum og hvað við stöndum fyrir. Mér finnst sérstaklega gaman að fylgjast með eldra fólki sem tjáir sig með klæðnaði.

Hvernig fylgist þú með tískunni?

Helst í gegnum Instagram

Rauður leðurjakki úr Rauða krossinum á Patreksfirði sem Jón breytti í vesti. MYND/AÐSEND

Hvar kaupir þú helst fötin þín?

Ég kaupi bara notuð föt eins og er og finn þau yfirleitt á fatamarkaðinum við Hlemm og í Rauða krossinum. Einstaka sinnum hef ég fundið föt á ruslahaugum erlendis. Annars bara reyni ég að kaupa föt sem eru einstök ein og sér og þegar einstakar flíkur koma saman gerist eitthvað skemmtilegt.

Hvaða litir eru í uppáhaldi?

Jarðlitir í mjög víðu samhengi.

Áttu minningar um gömul tískuslys?

Þau eru of mörg. Mér dettur t.d. í hug þegar ég notaði móðurborð á Playstation 2 fjarstýringu sem hálsmen í grunnskóla.

Hvaða þekktu einstaklingar eru svalir þegar kemur að tísku?

Íslenskir fatahönnuðir sem ég hef mikla trú á eru Sólveig Hansdóttir (@solhansdottir), Ása Bríet Brattaberg (@asabrietbratta), Guðmundur Magnússon (@gummo_), Arna Inga (@arnainga), Sigmundur Páll Freysteinsson (@sigmundurpf), Karítas Spano (@karitasspano) og stílistinn Díana Rós Breckmann (@dianabreckmann). Svo vil ég hrósa sérstaklega Viktori Má Péturssyni (@viktorthemagicthegatheringman). Annars finnst mér gaman að skoða Rick Owens, Maison Margiela, Issey Miyake, yohji yamamoto, Rei Kawakubo, Iris Van Herpen og Instagram síðuna @cryingdoves691.

Mokka jakkinn er úr Spuutnik, gallabuxurnar eru frá fatamarkaði og einnig 80´s skíðaskórnir. MYND/HARPA MJÖLL ÞÓRSDÓTTIR

Áttu eina uppáhaldsflík?

Núna er það bláa prjónaða hettan mín sem ég fann í gamla fataskáp ömmusystur minnar í sveitinni. Annars er það grár kanínuloðhattur sem ég erfði eftir bróður ömmu.

Ég kalla hann „síðasta bónda-hattinn“ því þetta var síðasti hatturinn hans og hann var síðasti bóndinn í sveitinni frá landnámi.

Hvaða flíkur hefur þú átt lengst og notar enn?

Ég á eina skyrtu sem er brún og vínrauð með gljáa sem ég hef átt í mörg ár og nota enn.

Bestu og verstu fatakaupin?

Bestu kaupin eru öll notuð föt sem ég hef keypt, meðan þau verstu eru öll þau „fast fashion“ kaup sem ég hef gert þegar ég vissi ekki betur.

Notar þú fylgihluti?

Hálsmenn, poka og svo eitthvað sem ég get sett á aðrar flíkur, eins og nælur eða t.d. hekluðu dúkkuhúfuna mína sem ég fann í Rauða krossinum.