María Gomez heldur úti matarblogginu Paz.is sem ætlað er nautnaseggjum sem hafa gaman af því að baka og elda góðan mat án mikillar fyrirhafnar, en flestar uppskriftirnar eru í einfaldari kantinum. María er mikill sælkeri og segist alltaf hafa haft gaman af því að reyna fyrir sér í eldhúsinu og fáum við að birta úrval uppskrifta úr fórum hennar. 

Stykkin eru ekki aðeins góð heldur súperholl líka. Þau innihalda alls kyns fræ og kínóa sem er prótenríkasta korn sem hægt er að fá. Sætan kemur svo úr döðlum sem eru járn-, steinefna- og trefjaríkar.

Ef þið viljið hafa þetta meira sætt má alveg leika sér smá með uppskriftina og bæta við t.d. þurrum trönuberjum eða einhverju sem þér þykir gott, eins og rúsínum eða brómberjum. Svo er allt heila klabbið toppað með 70 % súkkulaði eða heimagerðu hrásúkkulaði en þið ákveðið bara sjálf hvort þið viljið nota.

Medjool döðlur (eða 8-10 stk af ferskum döðlum)

80 gr haframjöl

130 gr óeldað kínóa (beint úr pokanum) 

70 gr gróft skornar möndlur

70 gr graskersfræ

1 tsk chiafræ

125 gr möndlusmjör (má vera ljóst eða dökkt og þess vegna hnetusmjör eða Tahini)

115 gr hunang

1 tsk vanillu extract

1/4 tsk salt

60 gr bráðið 70 % súkkulaði

Heimagert hrásúkkulaði

1 dl bráðin kókósolía

1 dl dökkt kakó (best lífrænt ræktað)

1/2 dl agave eða hlynsíróp

Hitið ofninn á 150 C°blástur.

Setjið dölðlurnar í matvinnlsuvél og stillið á pulse. Maukið þar til þær verða að mauki, má setja smá vatn með ef þarf en bara pínu pons.

Setjið nú döðlumaukið í skál og bætið við restinni af hráefnunum, öllu nema súkkulaðinu.

Hrærið nú vel saman með sleif, hér þarf sterka upphandleggsvöðva.

Setjið nú bökunarpappír í eldfast mót og látið pappírinn ná vel yfir alla barma til að auðvelt sé að smella svo kökunni upp úr.

Bakist í 20-25 mínútur eða þar til orðið gyllinbrúnt að lit og aðeins dekkra í köntunum.

Látið nú kólna í 1 klst upp á borði í mótinu, og setjið svo í ísskáp í aðra klst eða í frysti í 30 mínútur.

Takið svo út og skerið í ferninga og toppið með bræddu 70 % súkkulaði sem brætt er yfir vatnsbaði eða með heimagerða súkkulaðinu.

Þá er kókósolían brædd undir heitri bunu og svo kakó og síróp sett saman við og hrært varlega saman með gaffli.

Geymist við stofuhita í 1 viku og einnig er hægt að fyrsta stykkinn og taka út eitt og eitt 10 míntútum áður en maður ætlar að fá sér.