Carter Reum, eiginmaður og barnsfaðir Paris Hilton, yfirgaf dóttur sína skömmu eftir fæðingu hennar og hefur ekki talað við hana síðan.
Stúlkan er í dag tíu ára og sögð efast um að hún muni nokkurn tíma hitta föður sinn. Mail Online fjallar um þetta og hefur eftir heimildarmanni sem er nátengdur móður stúlkunnar, raunveruleikastjörnunni Lauru Belizzi.
Carter og Paris tilkynntu á dögunum að þau hefðu eignast dreng með aðstoð staðgöngumóður. Þetta er þó ekki fyrsta barn Carters því hann eignaðist dótturina Evie fyrir áratug.
Í umfjölluninni kemur fram að hann hafi verið viðstaddur fæðinguna, tekið dóttur sína í fangið og kysst hana á ennið áður en hann rétti barnsmóður sinni hana og gekk út. Dóttir hans hefur ekki séð né heyrt frá honum síðan.
Að sögn heimildarmanns óttast Evie að faðir hennar muni hafna litla bróður hennar, alveg eins og hann gerði við hana fyrir áratug. Þó hann greiði meðlag á hverjum mánuði, þá kemur það ekki í stað þess að eiga föður.
„Carter hefur ekki einu sinni viðurkennt Evie eða gefið henni afmælisgjöf eða jólagjöf,“ sagði heimildamaðurinn. Að hans sögn er Evie alveg sama, hún vill bara vera í sambandi við pabba sinn.
Meðal þess sem Evie hefur reynt til að ná sambandi við hann er að skrifa bréf til hans. Í bréfinu biður hún pabba sinn um að fá að vera hluti af lífi hans og að fá tækifærið til að kynnast fjölskyldunni hennar. Heimildarmaðurinn segir að Reum hafi ekki svarað bréfinu.
Reum og Hilton hafa ekki enn svarað fyrir þessar ásakanir.
