Þeir félagarnir, Ivan Svanur og Andri, hafa staðið í ströngu í sumar og blandað fjöldann allan af kokteilum sem eru líklegir til að njóta vinsælda á heimabarnum, í sumarbústaðnum eða hvar sem fólki dettur í hug að skella í góðan kokteil.

Báðir eru þeir með áralanga reynslu af fremstu kokteilbörum Reykjavíkur, hafa hreppt fjölda verðlauna í kokteilkeppnum og setið í stjórn barþjónaklúbbs Íslands.

„Við kynntumst á svolítið skemmtilegan hátt þegar ég var að keppa í minni fyrstu kokteilkeppni fyrir mörgum árum, en þá vorum við settir saman í síðasta hóp barþjóna til að stíga á stokk það kvöld. Þá tók við þriggja klukkustunda stressandi biðtími eftir því að fá að gera drykk fyrir dómnefnd. Andri var þar, búinn að keppa oft og vera í þessu töluvert lengur svo honum tókst að róa mig niður og ef ég man rétt þá endaði hann á að hreppa annað sætið í þeirri keppni,“ segir Ivan.

Allsherjar kokteilbiblía

Hvernig kom það til að þið ákváðuð að gefa út kokteilbókina Heimabar?

„Við höfðum báðir verið að gæla við hugmyndina í langan tíma. Eitt týpískt Covid-kvöld í október í fyrra vorum við að spjalla í síma þegar það kom upp að við værum báðir með hugmynd að bók og hún hét það sama hjá okkur báðum. Þá var eiginlega ekkert annað í boði en að gera þetta saman,“ segir Ivan og skellir upp úr.

Áherslur og markmið bókarinnar eru skýr og frá upphafi ákváðu þeir félagarnir að vera líka með ýmsan fróðleik um kokteila.

„Bókin er allsherjar kokteilabiblía þar sem við deilum meðal annars uppskriftum að alls kyns kokteilum, bæði eftir okkur sjálfa en einnig eftirtektarverðum heimsfrægum kokteilum, bæði gömlum og nýjum. Við vildum samt ekki bara gefa út uppskriftabók heldur er hún einnig uppfull af fróðleik um allt sem snýr að kokteilum. Við förum yfir klakann sem við notum, sírópin, líkjörana, baráhöldin, áfengistegundirnar og vörumerkin sem skipta svo miklu máli þegar gera á góðan kokteil,“ útskýrir Ivan. Markmið bókarinnar er að sýna fólki að þetta þarf alls ekki að vera flókið, með réttu þekkinguna getur hver sem er gert dýrindis kokteil.

Réttu baráhöldin

Aðspurðir segja þeir Ivan og Andri að það hafi verið leikur einn að setja saman bókina og þróa uppskriftirnar.

„Það gekk frábærlega að skrifa bókina. Við erum báðir með svo svipaða skoðun á kokteilum og með mikla þekkingu úr mismunandi áttum. Ekki skemmir fyrir að við erum búnir að vera vinir í mörg ár. Einhverjar uppskriftir urðu til við skrif bókarinnar en flestar uppskriftir höfum við verið að vinna með í langan tíma.“

Er nauðsynlegt að eiga ákveðin áhöld, tæki og tól til að geta blandað góða kokteila?

„Ég myndi ekki segja að það væri nauðsynlegt, það er faktískt séð hægt að nota hvaða ílát sem er til að hrista drykk, maður hefur alveg reddað sér í útilegu með krukku. Ef mann langar að gera fullkominn kokteil er það nauðsynlegt,“ segir Ivan og er á því að það sé ávallt skemmtilegra að vera með réttu áhöldin til að allt gangi upp.

Farið er yfir öll baráhöldin í bókinni og þar er líka kennt hvernig á að nota þau.

Það er smá kúnst að vera lunkinn með hristarann en um leið og fólk er búið að læra það einu sinni verður það ekkert mál, svipað eins og að læra að hjóla.“

Töfratrixin fyrir kokteilgerð

Ljóst er að til að blanda kokteil sem steinliggur þarf nokkur töfratrix sem skipta sköpum við kokteilgerðina.

„Það eru nokkur atriði sem þarf að hafa í huga, í fyrsta lagi að mæla hráefnin rétt í hristarann, kokteilar eiga aldrei að vera of sætir, súrir eða beiskir. Jafnvægið skiptir höfuðmáli og því mikilvægt að mæla vel og jafnvel smakka drykkinn áður en hann er hristur.“

Ivan og Andri hafa fundið fyrir miklum áhuga fólks að vera með heimabar og ef eitthvað er þá hafi áhuginn aukist enn frekar.

„Við finnum svo sannarlega fyrir auknum áhuga á kokteilum, á öllum vígstöðvum,“ segir þeir.

Eggnog kokteillinn er borinn fram í bollum.

Jólakokteillinn í ár

Eruð þið til í að svipta hulunni af jólakokteil ársins 2021?

„Við erum nokkuð vissir um það að eggnog sé jólakokteillinn í ár. Auk kokteilauppskrifta eru einnig uppskriftir að púnsskálum í bókinni og er ein þeirra alveg framúrskarandi eggnog-uppskrift sem við erum búnir að vinna í lengi. Það hefur alltaf tíðkast vestanhafs að drekka eggnog á jólunum og erum við staðráðnir í því að koma þeirri hefð til Íslands.“

Eggnog

1,5 l

250 ml koníak

150 ml ljóst romm

6 stk. egg

200-300 g sykur

700 ml mjólk

350 ml rjómi

Skraut: rifið múskat

Við byrjum á að brjóta eggin og taka rauðurnar frá hvítunum og setja þær í stóra skál. Svo hrærum við í þeim með rafmagnsþeytara og bætum sykrinum smátt og smátt við eggjarauðurnar þar til blandan byrjar að þykkna og taka á sig ljósari lit, það þarf ekki að vera að við notum allan sykurinn. Þá bætum við mjólkinni og rjómanum út í, einnig smátt og smátt á meðan við hrærum. Að lokum er áfenginu bætt við, öllu hrært vel saman og skálinni lokað og hún sett í ísskáp í smá stund eða þar til eggnogið er orðið hæfilega kælt. Við framreiðum svo púnsið okkar í bollum með rifnu múskati yfir og þá mega jólin koma.

Hægt er að nálgast upplýsingar á heimabarinn.is en að sögn félaganna er takmarkað af bókinni í boði. Hægt er að fylgjast með Heimabarnum á Facebook og Instagram.