Auður Marín lauk fyrsta árinu sínu í Háskólanum í Reykjavík í vor en hún leggur stund á nám í hagfræði og stjórnun. En í framtíðinni sér hún fyrir sér einhvers konar starf með fólki.

„Ég hef alltaf haft áhuga á viðskiptum og ég er frekar mannauðsmegin í minni viðskiptahugsun. Ég var á viðskiptabraut í framhaldsskóla. Það var alltaf stefnan að læra viðskiptafræði en svo færðist ég í átt að hagfræðinni og mannauðsmálum.“

Tengt áhuganum á mannauðsmálum og að vinna með fólki, kemur áhuginn á viðburðastjórnun, sem Auður Marín fær útrás fyrir í starfi sínu fyrir heimildamyndahátíðina IceDocs á Akranesi.

„Ég er umsjónarmaður gesta. Ég sé um flugferðir þeirra sem koma að utan og sé um gistingu. Ég er líka með allar upplýsingar um Akranes og hátíðina sjálfa fyrir gestina. Ég sé um að gestunum líði eins og þeir séu velkomnir og það sé tekið vel á móti þeim,“ segir Auður Marín.

„Mér finnst mjög gaman að vinna við þetta. Það gefur mér góða reynslu. Mér finnst gaman að vinna með fólki og redda hlutum. Að hafa umsjón með einhverju, vera til staðar fyrir fólk og vera kunnuglegt andlit fyrir gestina.“

Auður vill helst eiga nokkur pör af gallabuxum en kjólar eru samt í mestu uppáhaldi. MYND/AÐSEND

Lærði dans hjá pabba sínum

Auður Marín er að hluta alin upp á Akranesi og móðurfjölskyldan hennar er þaðan, svo hún er ekki ókunnug staðnum.

„Ég bjó á Akranesi í 10 ár þegar ég var í grunnskóla og Ingibjörg Halldórsdóttir, framkvæmdastjóri IceDocs, er frænka mín. Ég hafði rætt við hana um áhuga minn á viðburðastjórnun, svo þess vegna hafði hún mig í huga í sambandi við hátíðina og gaf mér tækifæri til að finna smjörþefinn af starfinu. Hún hefur líka hjálpað mér að komast inn í viðburði í dansheiminum,“ segir Auður, sem hefur dansað frá unga aldri.

„Pabbi minn var danskennari og hann kenndi mér grunninn í samkvæmisdönsum, en ég æfði þá aldrei. Ég fór svo út í street jazz og var mikið í því sem krakki. Ég fór svo að kenna í Dansstúdíói á Akranesi á meðan ég bjó þar. Ég hélt svo áfram að æfa svipaðan dans þegar ég varð eldri og flutti í bæinn,“ segir hún.

Auður tók sér svo smá hlé frá dansæfingum en byrjaði aftur í haust.

„Þá fór ég meira út í svona stelpudans, eða kvendans. Ég dansa á hælum. Ég er svolítið að læra inn á líkamann og að tjá mig með hreyfingu og verða örugg í líkamanum,“ útskýrir hún.

Auður á marga kjóla og á sumrin notar hún hvert tækifæri sem gefst til að klæðast þeim. MYND/AÐSEND

Fylgir ekki bylgjum

Auður Marín segist pæla mikið í tísku en í street-dansinum klæðist hún bara þeim fötum sem hún getur hreyft sig í og finnst þægileg.

„Það eru aðallega íþróttaföt og eitthvað vítt. Þegar við sýnum þá höfum við fengið boli til að vera í. Það eru ekki svona strangar reglur um klæðaburð í street-dansi eins og í samkvæmisdansi,“ segir Auður Marín.

„En þegar ég pæli í fötum þá er ég ekki mikið að fylgja bylgjum. Ég verð auðvitað fyrir áhrifum frá öðrum og fylgist aðeins með, en ég klæði mig samt bara í það sem mér finnst flott. Ég klæðist því sem gleður mig og því sem mér líður vel í. Mér er sama hvað öðrum finnst, ef mér líður vel og finnst ég vera flott, þá fylgi ég því.“

Auður segir að gallabuxur séu alltaf í uppáhaldi hjá henni en henni finnst gott að eiga gallabuxur í nokkrum litum, helst bláar eða svartar og svo nokkra mismunandi boli til að klæðast við þær.

„En ég er líka mikil stelpu-stelpa, þannig að ég er mjög hrifin af kjólum. Á sumrin reyni ég að vera eins mikið í kjólum og ég get. Uppáhaldsflíkin mín er kjóll frá Tommy Hilfiger, hann knúsar svolítið líkamann,“ segir Auður og bætir við að þessa dagana versli hún mest hér heima á Íslandi, en henni finnist samt mjög gaman að fara í verslunarferðir til útlanda.

„Þá leita ég oft að flík jafnvel í einhverjum merkjum. Mér finnst gaman að eiga eina og eina mjög góða flík sem passar við margt og maður getur átt lengi. Ég er þá aðallega að hugsa um gæðin. En annars versla ég eiginlega bara í hvaða búð sem er, ef ég finn eitthvað sem mér finnst flott. Ég held ég hafi klárlega verslað í flestum helstu fataverslunum hérlendis.“ ■