Kolbrún Bergþórsdóttir, bókmenntadrottning og einn þekktasti sérfræðingur landsins í málefnum bresku konungsfjölskyldunnar telur hertogahjónin Harry og Meghan hafa gert mikil mistök með því að hafa gefið út svona mikið efni eins og upp á síðkastið.
Kolbrún var gestur Crownvarpsins, viðhafnarhlaðvarps Fréttablaðsins um The Crown og bresku konungsfjölskylduna. Þar var hún spurð hvernig sér litist á nýjustu bók Harry, nýjustu þætti þeirra hjóna á Netflix og hlaðvarpsþætti Meghan Markle á Spotify.
Kolbrún horfði á heimildarþætti hjónanna á Netflix. „Þetta voru sex þættir. Var ekki hægt að koma þessu í tvo? Ég held þau séu að gera stórkostleg mistök. Það er of mikið framboð af þeim. Fólk verður bara leitt. Hvað hafa þau meira að segja? Ef þau ætla að ná einhverri athygli í framtíðinni þá verða þau að vera með fleiri bombur.“
Þórarinn Þórarinsson annar þáttastjórnenda segist sjálfur vera kominn með nóg af hjónunum.
„Ég komst í gegnum fyrsta þáttinn en gat ekki meir. Ég er kominn með alveg upp í kok af þessu fólki. Ég er viss um að þau hafi notið samúðar, en ég er ekki viss um að þetta hjálpi þeim þar, hvorki bókin né þættirnir,“ segir Þórarinn og Kolbrún tekur undir.
„Það er líka það, hverju hefur þessi bók skilað?“ spyr Kolbrún. „Þau hafa hrapað í vinsældum. Ekki bara í Bretlandi, heldur líka í Bandaríkjunum. Það held ég að sé sárt fyrir þau,“ segir Kolbrún sem segist hafa sínar skýringar á þessum auknu óvinsældum hertogahjónanna.
„Ein skýringin á því held ég að sé sú að það er innbyggt í okkur ákveðin siðalögmál. Eitt af þeim er að ekki flagga óhreina þvottinum þínum. Ekki fórna fjölskyldunni þinni fyrir peninga. Þú bara gerir það ekki. Eða fórna þeim til þess að lyfta sjálfum þér upp. Hann fórnar öllu og er kannski verstur við bróður sinn.“
Crownvarpið má hlusta á á Spotify undir merkjum Bíóvarpsins og einnig hér að neðan:
