Í þættinum Framkoma á Stöð 2 í gærkvöldi spjallaði Fannar Sveinsson við Sigurð Gunnarsson, eða Sigga Gunnars útvarpsmann á K100.

Siggi segir frá tímanum þegar hann uppgötvar að hann sé samkynhneiðgur og að hann hafi ekki komið út úr skápnum fyrr en 25 ára gamall. Þetta kemur fram á Vísi.

„Talandi um það að ég sé svo oft fastur í hausnum á mér og býst alltaf við verstu mögulegu útkomunni. Ég bjóst ekki við því að ég gæti unnið í því sem ég vildi vinna í ef ég kæmi út úr skápnum,“ segir Siggi.

Hann hafi verið viss um að allt myndi snúast gegn honum í lífinu ef hann kæmi út úr skápnum en það hafi hans innri fordómar.

„Þú ert með svo mikla innbyggða fordóma gagnvart sjálfum þér. Ég var bara búinn að búast við því að fjölskyldan myndi snúa við mér bakinu, vinirnir myndu snúa við mér bakinu og heimurinn myndi bara hrynja. Ég er að fatta að ég sé hommi 11, 12 ára og hverjum einasta degi í tíu ár ert þú að hugsa, ég er slæmur, ég er hræðilegur, ég er ógeð,“ segir Siggi og útskýrir að ástæðan fyrir því að hann sé svona glaður í dag sé líklega vegna þess að hann hafi lifað þetta af.

„Ég er svo þakklátur að hafa komið út úr skápnum og fengið þetta verkefni í lífinu. Þetta er það besta sem gat komið fyrir mig, þú ferð í svo mikla sjálfsskoðun og þetta er mikið uppgjöf við sjálfan þig,“ segir Siggi.