Glæsileg 327 fermetra þakíbúð er á sölu á Tryggagötu 18 en fasteignasalinn Gunnar Sverrir Harðarsson hjá RE/MAX Senter annast sölu eignarinnar. Ásett verð eru 390 milljónir.

Um er að ræða fallega og bjarta íbúð í fjölbýlishúsi í hjarta miðbæjarins á efstu hæð, en fjögur herbergi eru í íbúðinni, þrjár stofur, tvö svefnherbergi og þrjú baðherbergi.

Í íbúðinni eru innréttingar frá Poliform, eldhústæki frá Siemens í samráði við hönnun frá Poliform. Þá er sérstakt lyklalaust aðgangskerfi frá GIRA í íbúðinni og rafstýrð gluggatjöld og gluggar í allri íbúðinni. 

Ljósakerfi er jafnframt miðstýrt frá GIRA og þá er hiti í gólfi og miðstýring frá GIRA stjórntæki í stofunni. Ljósar ítalskar flísar eru í allri íbúðinni og tvær stórar geymslur eru jafnframt með íbúðinni auk tveggja bílastæða. Þá eru hljóðkerfi og sjónvörp frá Bang&Olufsen.

150 fermetra svalir eru svo í íbúðinni með stórbrotnu 360 gráðu útsýni yfir miðbæ Reykjavíkur, höfnina, Bláfjöll og Reykjanesið en beint aðgengi er inní íbúðina frá lyftu.

Sjá má myndir frá þessari glæsilegu eign hér að neðan.