Breski tónlistarmaðurinn Ed Sheeran kemur hingað til lands á næsta ári en hann hyggst halda tónleika á Laugardalsvelli þann 10. ágúst 2019. Sena Live greinir frá í tilkynningu til fjölmiðla.

Ljóst er að margir munu bíða með eftirvæntingu eftir stórstjörnunni sem gefið hefur út fjölda slagara. Tónleikarnir á Íslandi eru hluti af ferðalagi sem standa mun yfir frá maí til ágúst en auk þess kemur hann fram í Frakklandi, Portúgal, Spáni, Ítalíu og Þýskalandi svo fátt eitt sé nefnt.

Miðasala hefst klukkan 9:00 að íslenskum tíma fimmtudaginn 27. september fyrir alla tónleika ferðalags Sheeran. Miðasalan fer fram á tix.is/ED

Ed fetar í fótspor rokkgoðsagnanna í Guns N' Roses sem héldu tónleika á Laugardalsvelli í sumar en það voru stærstu tónleikar sem haldnir hafa verið hér á landi.

Fréttin hefur verið uppfærð.