Hersir, ásamt dætrunum Signýju og Ingimundu, sótti námskeiðið hjá Halldóri Kristjáni Sigurðssyni, bakara og konditor í Minigarðinum, en á því er farið í alla grunnþætti konfektgerðar.

„Það var feðradagurinn um daginn og þær komu mér svona skemmtilega á óvart. Þær vildu endilega fara með karlinn á konfektnámskeiðið. Elsa Antheia, dóttir mín sem býr í Svíþjóð, gat ekki verið með okkur þótt glöð vildi,“ segir Hersir.

„Þetta var tveggja og hálfs tíma námskeið þar sem við lærðum að tempra súkkulaði, fylla í mót og búa til fyllingu. Þetta var alveg geggjað og ég er strax orðinn heitur fyrir því að fara aftur og læra meira. Ég mun pottþétt föndra eitthvað við konfektgerðina fyrir jólin. Ég er búinn að kaupa mér fullt af mótum en á eftir nota þau. Við erum að plana að hafa konfektgerðarkvöld fljótlega og nýta okkur það sem við lærðum á námskeiðinu, sem ég mæli svo sannarlega með,“ segir Hersir.

Hersir kann hvergi betur við sig en í eldhúsinu, en hann hefur ákaflega gaman af því að baka og af allri matargerð.

„Ég elska það að baka og er alltaf opinn fyrir einhverju nýju. Við ræddum það í fyrra að það væri sniðugt að fara á svona námskeið. Við vorum að reyna að gúgla þetta sjálf með misjöfnum árangri, en svo kom þetta óvænta boð frá stelpunum mínum og það var virkilega gaman og gagnlegt. Nú held ég að það sé næst á dagskrá að fara á námskeið fyrir lengra komna og reyna fyrir sér meira út í skrautið. Þetta var svona grunnnámskeið til að koma sér af stað. Ég held að Halldór sé búinn að vera að kenna fólki konfektgerð í um 25 ár og við feðginin vorum afar ánægð.“

Þægilegt að kúpla sig frá vinnunni

Nú í jólamánuðinum er Hersir svo sannarlega í essinu sínu, enda fær hann meiri tíma til að brasa í eldhúsinu og stússast við eldamennsku og bakstur.

„Ég er í stressvinnu og í miklum látum og þá finnst mér afskaplega þægilegt að kúpla mig frá vinnunni, setja hrærivélina í gang og hita bakarofninn. Í desember verður gríðarleg stemning og mikil viðvera í eldhúsinu þar sem ég mun prófa mig áfram með ýmislegt góðgæti,“ segir Hersir, sem starfar við sölumennsku hjá Ó. Johnsen & Kaaber/ISAM/SD

Hersir segist ekki vera einn í matar- og bakstursgerðinni fyrir jólin. „Konan mín er með mér á fullu í þessu og við erum mjög góð í að skipta verkum.“

Haldið þið í hefðirnar um jólin hvað matinn varðar?

„Við erum alltaf með mjög svipað. Þetta er hamborgarhryggur, kalkúnn og hangikjöt. Núna er ég hins vegar að spá í að breyta aðeins til og vera með nautalund annan í jólum. Ég á góða vini og félaga sem eru kokkar og þeir eru alltaf tilbúnir í að henda til mín góðum ráðum og láta mig prófa hitt og þetta,“ segir Hersir, sem veit fátt skemmtilegra en að skella deigi í form og baka.

„Ég geri ansi mikið af því að baka og oftar en ekki fæ ég barnabörnin mín til taka þátt í bakstrinum en þá hef ég þetta einfalt, kaupi tilbúið deig, sker það niður og baka. Fyrir jólin hef ég haft það fyrir sið að baka alltaf mömmukökur. Búa til kökur sem mamma gerði, en þegar ég var strákur át maður þær upp til agna. Ég mun baka eina sort af þeim fyrir jólin og svo auðvitað heimalagað brauð,“ segir Hersir.

Hersir segir að áhugi hans á eldamennsku og bakstri hafi verið lengi til staðar. „Ég hef eldað og bakað í mörg ár og það hefur bara aukist með árunum. Ég elska að setja inn myndir af hinum ýmsu réttum á Facebook og ég veit um tvo félaga mína sem hata mig fyrir það,“ segir Hersir og hlær dátt. „Þeir eru alltaf að biðja mig um hætta þessu en ég læt það ekki eftir þeim. Mér finnst það veita sálinni ró að elda og baka og ég næ að kúpla mig frá öllu á meðan. Samstarfsfólk konunnar elskar mig hins vegar því ég er stöðugt að færa þeim einhverjar kræsingar eftir sjálfan mig. Þau njóta góð af þessu.“

Þeir eru girnilegir, konfektmolarnir sem Hersir bjó til.