Lífið

Drap næstum söngvarann á fyrsta Airwaves

Franz Gunnarsson hefur spilað á hverri einustu Airwaves hátíð frá upphafi og upplifað ýmislegt í gegnum árin. Hann segir hátíðina vera að þróast í rétta átt og vonast eftir orkumiklum tónleikum í ár.

Franz Gunnarsson er líklega sá eini sem hefur spilað á hverri einustu Airwaves-hátíð. Hann hefur aðallega spilað með sveitunum Dr. Spock og Ensími og hefur lent í ýmsu eftirminnilegu á þessum tveimur áratugum. MYND/ANTON BRINK

Franz Gunnarsson er líklega sá eini sem hefur spilað á öllum tuttugu Iceland Airwaves hátíðunum, sem hann segir að sé í rauninni uppskeruhátíð íslensku tónlistarsenunnar.

„Iceland Airwaves snýst um að íslenskir tónlistarmenn komi saman, geri sitt allra besta á tónleikum, setji smá auka fútt í sýninguna og framkomuna og yfirleitt keyra þeir einhver ný prógrömm,“ segir Franz. „Þannig að þú færð tónlistarmennina í miklu stuði og með nýtt efni.“

Margar litríkar minningar

Franz hefur spilað með ýmsum virkum og metnaðarfullum sveitum á ferlinum og fyrir vikið hefur hann endað með því að spila á hverri einustu Airwaves hátíð.

„Sveitirnar sem ég hef starfað í hafa alltaf haft eitthvað fram að færa, annað hvort verið með nýja plötu eða það hefur verið sóst eftir því að fá okkur að spila,“ segir Franz. „Hljómsveitirnar hafa svolítið verið að skiptast á milli hátíða. Fyrst og fremst hafa þetta verið Dr. Spock og Ensími. Svo hef ég líka spilað með Cynic Guru, í fyrra spilaði ég með sólóverkefninu mínu, Paunkholm, og svo hef ég bara spilað með hinum og þessum, þar á meðal fullt af verkefnum sem ég man ekki einu sinni eftir lengur. Það er erfitt að halda yfirsýn yfir þetta, ég hef spilað með svo mörgum og þetta er svo langur tími.“

Franz hefur lent í ýmsu eftirminnilegu á þessum hátíðum. „Fyrsta Airwaves-ið er mjög eftirminnilegt. Þar var ég hreinlega næstum búinn að ganga af söngvaranum dauðum. Ég átti það til á þessu tímabili að fleygja gítarnum mínum þvert yfir sviðið, svona í lokalaginu. Það var einhver árátta,“ segir Franz. „En akkúrat þarna var hann að bakka frá hljóðnemanum og gítarinn flaug hársbreidd fram hjá hausnum á honum. Ég hefði getað örkumlað eða drepið hann þarna og ég hef ekki stundað þetta síðan.

Franz spilar með Dr. Spock á á Gauknum annað kvöld klukkan 22.50. Þar ætla þeir að spila efni af plötunni sem þeir gáfu út fyrr á árinu. MYND/ANTON BRINK

Ég gleymi því ekki heldur þegar ég var að spila með nýju og fersku bandi sem þótti mjög heitt á rosa góðum tíma í Listasafninu og tölvan með öllu playback-inu bilaði,“ segir Franz. „Það var reynt að ræsa hana svona þrisvar, fjórum sinnum upp og svo var bara gefist upp og gengið út af sviðinu og ekki spiluð nóta. Það var fyrir framan fullan sal af æstum útlendingum sem vildi fá að heyra þetta nýja, heita band, sem hét Atingere. Það var ansi eftirminnilegt.“

Ánægður með þróunina

„Hátíðin þróaðist frá því að vera lítil og nett upp í að verða aðeins stærri en hún hefði átt að höndla. Það var verið að fá stór atriði og bæta Höllinni inn í þetta og svona og hátíðin fór að reyna að vera eitthvað annað en hún var í grunninn,“ segir Franz. „Það er held ég í eðli svona hátíða að prófa sig áfram, en mér sýnist hún núna komin aftur á þann stað sem hún var í byrjun. Hún er aftur svona lítil hátíð sem kynnir ný, ung og upprennandi atriði í bland við eldri rostunga eins og Dr. Spock.

Ég er líka spenntur að sjá hvaða áhrif það hefur á hátíðina að draga úr „off venue“ tónleikum og setja meiri áherslu á hátíðina sjálfa,“ segir Franz. „Off venue var orðið rosalega stór hluti af hátíðinni og tók mikið af athyglinni. En þegar fólk er að spila á mörgum tónleikum áður en kemur að aðaltónleikunum á Airwaves, þá er kannski ekki mikill kraftur eftir. Þannig að ég vonast til að Airwaves kvöldin sjálf verði orkumeiri en áður.“

Hljómsveitin Dr. Spock hefur verið starfandi síðan á 10. áratug síðustu aldar og gaf út nýjustu plötuna síns, Leður, fyrr á þessu ári. MYND/BRYNJAR SNÆR

Spilar á Gauknum á morgun

Í ár spilar Franz á Airwaves með sveitinni Dr. Spock á Gauknum annað kvöld, laugardaginn 10. nóvember, klukkan 22:50. „Við ætlum að spila efni af plötu sem við gáfum út snemma á þessu ári og hafa gaman af,“ segir Franz. „Svo ætla ég bara að gera eins og ég geri yfirleitt rétt fyrir hátíð og hlusta á spilunarlista Airwaves á Spotify og þefa þannig upp það sem mér þykir markverðast og langar að sjá.

Franz segist spenntur fyrir að sjá félaga sína í Warmland á sviði. „Það eru Hrafn, söngvarinn úr Ensími og Arnar, kenndur við Leaves,“ segir Franz. „Þeir eru með mjög skemmtilegt verkefni saman og ætla að gefa út plötu bráðum, en lögin þeirra hafa gert það gott í útvarpinu undanfarið. Ég held að það verði helvíti sexý.“

PJ Harvey og Sparta standa upp úr

Franz hefur séð mörg hundruð tónleika á Airwaves á síðustu 20 árum, þannig að honum finnst erfitt að segja hvað ber hæst. „En á síðustu árum myndi ég segja að PJ Harvey hafi staðið upp úr. Hún hefur verið í uppáhaldi lengi og það var æðislegt að sjá hana loksins og það á Íslandi,“ segir Franz. „Það var líka mjög flott þegar hljómsveitin Sparta, sem var meðal annars skipuð meðlimum úr At The Drive In, spilaði á Gauknum. Þetta var Dr. Spock, Mínus og Sparta, hin heilaga þrenning. Það var mjög heitt og sveitt kvöld!“

Bíður eftir að heyra frá Krumma

Talandi um Mínus, Krummi í Mínus hefur rætt við Franz um samstarf í tengslum við kántríplötu sem Krummi er að vinna í. Franz segist spenntur fyrir samstarfinu. „Við ræddum hvort ég ætti ekki að koma og gera einhvern galdur,“ segir Franz. „Þannig að ég hendi boltanum bara aftur til hans Krumma; hvenær á ég að mæta?“

Athugasemdir

Auglýsing
Auglýsing

Tengdar fréttir

Lífið

Rússnesk stúlka krækti í íslenskan landsliðsmann

Lífið

Disney birtir nýja stiklu úr Dumbo

Lífið

Efsta hæðin á Tryggvagötu 18 til sölu

Auglýsing

Nýjast

Hildur Eir og Heimir opna sig um skilnaðinn

Birti mynd af sér í karaókí með Zucker­berg

Hömlulaus og hamflett í Tvískinnungi

Heimildirnar eru bensínið

Undraheimar tískunnar opinberaðir

Vísaði ó­vart í nýjasta lag Ari­önu Grande á Twitter

Auglýsing