Fólk

Dragið sameinar öll listform

Neville J. Ingley kom til Íslands fyrir sex árum til að hefja nýtt líf í samfélagi þar sem kynhneigð hans væri ekki til trafala. Hann hefur getið sér gott orð sem framkomulistamaður undir dragnafninu Deff Starr og er hluti af draglistahópnum Dragsúgi.

Deff Starr skammt frá Hörpu þaðan sem Gleðiganga hinsegindaga leggur upp stundvíslega klukkan tvö í dag. MYND/Stefán

Ég er frá Mið-Englandi, litlu þorpi í Staffordshire sem var mjög sveitó og ekki mikið umburðarlyndi í gangi. Ég flutti eins fljótt og ég gat til London og kynntist fyrrverandi kærastanum mínum þar þegar ég var 22 ára. Við vorum í fjarsambandi því hann er frá Sviss og svo þegar hann fékk vinnu á Íslandi ákvað ég að flytja hingað líka og láta reyna á sambandið,“ segir Neville. „Ég hafði alltaf verið spenntur fyrir Íslandi. Ég vissi að ég vildi vinna við eitthvað skapandi og Ísland er mjög skapandi staður. Svo skipti líka máli sú staðreynd að mannréttindi samkynhneigðra eru lengra komin hér á Íslandi en víða annars staðar þannig að ég vissi að ég yrði ekki fyrir fordómum.

Í flestum öðrum löndum snýst samkynhneigð svo mikið um réttindabaráttu, sumstaðar bara fyrir því að fá að vera til, en hér finnst mér hlutirnir snúast meira um að fagna fjölbreytileikanum því svo mörgum réttindum hefur verið náð þótt auðvitað sé ýmislegt eftir. Það er líka gott að finnast maður velkominn í framandi landi. Þegar sambandinu lauk fyrir þremur og hálfu ári fannst mér ég þurfa að vera lengur á Íslandi, hér væri eitthvað sem ég ætti eftir að gera.“

Drottning með Dragsúgi

Neville hefur einna helst vakið athygli fyrir framkomu með fjöllistahópnum Dragsúgi. „Minn fyrrverandi var einn af stofnfélögunum í Dragsúgi og þó að mig langaði mjög mikið að vera með fannst mér nóg að hafa eina drottningu á heimilinu,“ segir hann og hlær. „Ég byrjaði svo fyrir tæpum tveimur árum og núna er ég einn af virkustu meðlimunum.“

Dragsúgur er með reglulegar sýningar á Gauknum þar sem meðlimir hópsins leika á ýmsum mörkum fyrir troðfullum sal æstra aðdáenda og Neville hefur ekki látið sitt eftir liggja.

„Ég hef alltaf upplifað mig sem listamann og sem slíkur er ég alltaf að finna út hvað ég get gert og hvað ég kemst upp með. Ég hef lært textílhönnun, grafíska hönnun og skúlptúrgerð þar sem ég lærði að nota alls konar efni sem nýttist mér þegar ég fór að búa til höfuðbúnað og búninga. Ég held reyndar að allt sem ég hef lært gegnum tíðina hafi gagnast mér í draginu – þar sameinast öll listformin. Mér finnst mikilvægt að segja sögur, fyrst ég er á sviði á annað borð finnst mér mikilvægt að koma af stað samræðu við áhorfendur, ná tengslum við þá, smita þá af hugmyndum, halda athygli þeirra og hreyfa við þeim.“

Neville J. Ingley eða Deff Starr er ein sérstæðasta dragdrottning landsins. Búningurinn er eftir hann en höfuðbúnaðurinn unninn í samvinnu við Zizka. Mynd/Stefán

Dauðastjarnan Deff Starr

Allir draglistamenn eiga sér sviðsnafn og Neville segir að Deff Starr nafnið hafi byrjaði sem grín. „Gógó Starr er dragmóðir mín og lærimeistari. Hún er glamúrinn uppmálaður og afar fagleg í vinnubrögðum, eiginlega allt sem ég er ekki, svo við grínuðumst með að ég myndi kalla mig Death Starr eins og í Stjörnustríði, en fyrsta sýningin sem ég tók þátt í var með vísindaskáldsöguþema. Death Starr breyttist svo í Deff Starr og hefur haldist síðan.“

Hann segir að nafnið hafi mótað sviðslist sína að vissu leyti. „Ég sæki mikið í vísindaskáldskap og hrylling en líka sterkar tilfinningar enda er ég sporðdreki sem stjórnast af Plútó sem sumir kalla dauðastjörnuna. Ég dregst mjög að því myrka en trúi að það sé alltaf hægt að finna eitthvað fallegt og jákvætt. Og þetta varð eiginlega leiðarljós í atriðum Deff Starr, að fara frá myrkri og hryllingi, sorg og depurð, yfir í von og ljós. Mér finnst mikilvægt að færa áhorfendum þessa von.“

Þriggja tíma umbreyting

Það tekur tímann sinn að koma Deff Starr á kreik. „Ég vil helst hafa um þrjá tíma til að koma mér í drag,“ segir Neville. „Ég nota meira listræna förðun en hefðbundna, kvenlega förðun og finnst gaman að leika mér með liti og form. Dragið mitt er ekki venjulegt og ekki förðunin heldur. Ef ég er að gera útlit sem ég þekki og hef gert áður getur það tekið styttri tíma en aldrei minna en klukkutíma.

Ég vil helst alltaf vera með ný atriði með Dragsúgi, eða prófa nýja búninga og förðun og það tekur tíma. Eftir að hafa gert þetta í heilt ár núna veit ég meira hvað hentar mér og er búinn að búa mér til minn stíl. Það er gott að vita hvað ég vil leggja áherslu á og hvað veitir mér innblástur.“

Deff Starr sækir innblástur til fornra gyðja og sterkra kvenna sem eru óhræddar við að fara eigin leiðir. Stefán Karlsson

Innblásinn af sterkum konum

Talandi um innblástur fyrir Deff Starr segist Neville sækja hann víða að. „Ég fæ innblástur frá fornum menningarheimum og trúarbrögðum, gyðjum og vættum. Ég fæ líka innblástur frá sterkum og sjálfstæðum baráttu- og listakonum sem ekki fara hefðbundnar leiðir að fegurð, eins og Björk, Grace Jones og fleiri og fleiri.“

Hann segir dragsenuna á Íslandi frábrugðna þeirri í öðrum löndum og meira spennandi að mörgu leyti. „Áður en Dragsúgur kom til sögunnar hafði Ísland ekki stóra dragsenu en kabarettformið var vel þekkt. Þar viltu halda áhorfendum á tánum, koma þeim á óvart eða hreyfa við þeim og ég held að þessi leikhúsbakgrunnur geri það að verkum að Íslendingar eru kröfuharðari við drag- og kabarettlistamenn en til dæmis Bandaríkjamenn. Þar er nóg að fara í flott gervi, hreyfa varirnar með lögum og dansa fallega. Sem er í fínu lagi. En Íslendingar vilja meira og það gerir það að verkum að senan hér er mjög spennandi og lifandi,“ segir hann og viðurkennir að íslenskir áhorfendur séu ekki auðveldir. „Íslendingar eru almennt ekki meðvirkir. Ef þú segir vondan brandara hér þá fer enginn að hlæja af kurteisi. Íslendingum leiðist meðalmennska og hafa ekkert pláss fyrir hana.“

Í augnhæð við áhorfendur

Gleðiganga Hinsegin daga leggur af stað frá Hörpu klukkan tvö í dag og Deff Starr lætur hana ekki fram hjá sér fara.

„Ég verð að sjálfsögðu í gleðigöngunni með Dragsúgi. Við vorum með pallbíl í fyrra en í ár viljum við vera sýnilegri og þess vegna ætlum við að ganga á götunni til að upplifa meiri nánd við þá sem eru að fagna. Drag er mjög myndrænt listform og það er miklu betra að sýna það í augnhæð við áhorfendur.“

Athugasemdir

Auglýsing
Auglýsing

Tengdar fréttir

Helgarblaðið

Þátt­takan í Ru­P­aul's breytti öllu

Helgarblaðið

Hef aldrei komið út úr skápnum

Helgarblaðið

Samrýnd systkini

Auglýsing

Nýjast

Möguleikarnir nær óþrjótandi

Ástin blómstrar eftir Bachelorinn: „Ég vildi fara heim með henni“

Eiga von á eineggja tví­burum

Lokkandi leirtau úr Landmannalaugum

Afskaplega gott að syngja eftir Jón Ásgeirsson, það virkar allt

Kóngur ofurhuganna

Auglýsing