Það er komin helgi og þá er um að gera vel við sig og baka súkkulaðiköku sem slær í gegn. Berglind Hreiðars, einn vinsælasti köku- og matarbloggari landsins sem heldur úti bloggsíðunni Gotterí og gersemar kann svo sannarlega að laða fram rétta súkkulaðibragðið sem enginn getur staðist. Hér fáum við eina úr smiðju hennar sem enginn súkkulaði dýrkandi ætti að láta framhjá sér fara. Hér er á ferðinni djúsí súkkulaði brownie sem bráðnar í munni og skilningarvitin fara á flug.

„Almáttugur minn, þessi kaka. Sjúklega djúsí og klístruð með ríku súkkulaðibragði, alveg eins og svona kökur eiga að vera,“segir Berglind en hún elskar djúsí kökur sem bráðna í munni, sérstaklega súkkulaði ríkar.

FBL Brownie-1.jpeg

Djúsí súkkulaði BROWNIE

120 g smjör

150 g dökkt súkkulaði

250 g Milka Daim súkkulaði

180 g púðursykur

2 tsk. vanilludropar

3 egg

100 g hveiti

100 g Oreo Crumbs

  1. Hitið ofninn í 160°C.
  2. Bræðið smjör, dökkt súkkulaði og 150 g af Milka Daim súkkulaðinu saman í potti við vægan hita. Það er allt í lagi að Daimið sé enn í bitum en þegar súkkulaðið er bráðið má slökkva á hellunni og leyfa hitanum að rjúka aðeins úr á meðan önnur hráefni eru vigtuð og undirbúin.
  3. Klæðið ferkantað bökunarmót (um 25 x 25 cm) að innan með bökunarpappír, spreyið smá matarolíuspreyi í botninn og geymið þar til deigið er tilbúið.
  4. Saxið 100 g af Milka Daim súkkulaði gróft niður og leggið til hliðar.
  5. Setjið súkkulaðiblönduna í hrærivélarskálina og hrærið púðursykri og vanilludropum saman við.
  6. Því næst má setja eggin saman við, eitt í einu og hræra og skafa niður á milli.
  7. Þá fer hveitið saman við og hrærið þar til slétt deig hefur myndast og blandið að lokum söxuðu Milka Daim súkkulaðinu varlega saman við.
  8. Hellið deiginu í bökunarmótið og stráið Oreo Crumbs yfir allt.
  9. Bakið í um 35-40 mínútur eða þar til prjónn kemur út með smá kökumylsnu á en ekki blautu deigi.
  10. Kælið kökuna alveg, lyftið henni þá upp úr með því að halda í bökunarpappírinn og skerið síðan í bita.

Svo er að bara að njóta hvers einasta munnbita.

FBL Brownie-3.jpeg

Ómótstæðilega girnileg þessi og bráðnar í munni við hvern bita./Ljósmyndir Berglind Hreiðars.