María Gomez lífsstíls- og matarbloggari sem heldur úti bloggsíðunni paz.is er mikill aðdáandi Starbucks sítrónuformkökunnar og er búin að finna sína fullkomnu útgáfu sem deilir hún hér með okkur.

„Stundum langar mig svo mikið í eitthvað sem ég hef smakkað erlendis og kemur þessi kaka ansi oft upp í hugann,“ segir María sem auðvita fór á stúfana í bakstrinum og masteraði sína sítrónuformköku. „Mín útgáfa er dásamlega mjúk og svampkennd og mátulega sæt í bland við ferskleika. Ég vil hafa mikið sítrónubragð og því er ég ekkert að spara sítrónubörkinn né sítrónusafann.“

Það sem gerir kökuna síðan fullkomna er að sjálfsögðu kremið og sítrónusíróp sem er pennslað á hana heita. Kökuna er afar einfalt að gera og við mælum með þessari með sunnudagskaffinu.

FBL Sítrónuformkaka 4.jpeg

Sítrónukaka

200 g sykur

115 g mjúkt smjör

2 egg

1 tsk. vanilludropar

180 g hveiti

1 tsk. lyftiduft

½ tsk. matarsódi

½ tsk. fínt borðsalt

Börkur af tveimur sítrónum (passa að hafa bara gula hlutann en ekki hvíta)

1,5 dl súrmjólk

Síróp

60 g flórsykur

½ dl nýkreistur sítrónusafi

Krem

200 g flórsykur

3 msk. nýkreistur sítrónusafi

2 msk. mjólk

1 msk. rjómaostur (má sleppa en gerir rosa gott bragð)

Kaka

  1. Hitið ofninn á 180 °C blástur.
  2. Byrjið á að þeyta saman sykur og mjúkt smjör í góðan tíma eins og 5 mínútur plús þar til er orðið létt og ljóst.
  3. Hafið vélina áfram í gangi og setjið eitt egg út í meðan er að hrærast. Þegar það er blandað við smjörið setjið þá næsta egg ásamt vanilludropum, með vélina áfram í gangi.
  4. Hafið kveikt áfram á hrærivélinni og sigtið í aðra skál hveiti, salt, lyftiduft og matarsóda og bætið því út í hrærivélarskálina,á lægsta hraða, janft í 3 til 4 pörtum.
  5. Passið að hræra ekki of mikið en slökkvið á hrærivélinni þegar hveitið er komið rétt inn í deigið.
  6. Raspið þá börkinn út í deigið (bara gula part ekki hvíta) og setjið súrmjólkina út í og kveikið aftur á hrærivélinni á lægsta hraða og hrærið eins lítið saman og þið komist upp með svo kakan verði ekki þung í sér og seig.
  7. Setjið deigið í vel smurt brauðform og bakið í 45-55 mínútur. Gott er að stinga prjón í kökuna eftir 45 mínútur í ofninum og ef hann kemur hreinn upp úr er kakan til ,ef ekki bætið þá 5-10 mín við í viðbót og stingið prjóni aftur í kökuna eftir það.
  8. Búið til sírópið meðan kakan er í ofninum.

Síróp

  1. Hrærið flórsykri og nýkreistum sítrónusafa vel saman og leggjið til hliðar meðan kakan bakast.
  2. Takið kökuna úr forminu þegar hún hefur kólnað eins og í 15 mínútur.
  3. Þá er gott að pennsla sírópinu vel yfir hana alla, þið getið notað allt sírópið eða það magn sem þið kjósið. Ég notaði næstum allt sírópið, en mikilvægt er að pennsla því yfir kökuna meðan hún er enn heit eða volg.
  4. Leyfið nú kökunni að kólna alveg niður og gerið kremið á meðan.

Krem

  1. Sigtið flórsykur í skál og bætið sítrónusafanum út í ásamt mjólkinni.
  2. Mér finnst gott að þeyta kremið í handþeytara eða hrærivél svo það verði loftkennt og létt.
  3. Þegar kremið er orðið fallega hvítt bæti ég rjómaostinum út í og hræri vel saman.
  4. Kreminu er svo hellt yfir kökuna þegar hún hefur alveg kólnað.

Berið fallega fram og njótið.

FBL Sítrónuformkaka paz 3.jpeg

Þessi dásemd er mjúkt og svampkennd, mátulega sæt í bland við ferskleika þar sem sítrónubragðið fær að njóta sín./Ljósmyndir María Gomez.