Ljósmyndari fer með vinningshafanum í ferðina og tekur myndir af búningnum sem vinningshafinn fær svo að eiga, en svo verða ýmis fleiri verðlaun líka,“ segir Regína R. Friðriksdóttir einn skipuleggjenda keppninnar.

„Þetta er stærsta búningakeppni af þessari tegund sem er haldin á Íslandi,“ segir Regína. „Við héldum svona keppni í fyrra og þá voru miklu fleiri sem tóku þátt en við bjuggumst við. Maður veit ekkert hvað margir eru í búningagerð á Íslandi. Það vantar vettvang fyrir fólk í búningagerð til að sýna hvað það getur.“

Regína segir að í keppninni í fyrra hafi verið mikið af hæfileikaríku fólki. „Það eru greinilega margir hér sem hafa áhuga á búningagerð. Að sjálfsögðu var líka fólk sem var í keyptum búningum en mjög margir gerðu sína eigin.“

Þátttakendur í fyrra lögðu mikinn metnað í búningana.

Erlendar nördahátíðir snúast að miklu leyti um búningana, að sögn Regínu. „Auðvitað er mikið um aðra dagskrá eins og pallborðsumræður. En það er stór partur af svona hátíðum að sjá búningana.“

Eins og áður segir verður keppnin á sunnudaginn. „Hún hefst klukkan 19.40 á sunnudagskvöldið. Þetta er svona lokapartur hátíðarinnar. Keppninni er skipt upp í fjóra hópa í ár. Yngri en 14 ára, 14-17 ára, 18 ára og eldri og hópakeppni.

„Í dómnefnd er fólk sem þekkir vel til búninga. Það er annaðhvort að vinna við búningagerð eða nota búninga í vinnu. Þetta er fólk sem veit hvað það er að tala um þegar það dæmir búningana.“

Það mátti sjá ýmsar verur í búningakeppninni í fyrra.

Búningarnir í keppninni þurfa ekki að fylgja neinu sérstöku þema. „Það má vera í hvernig búningi sem er. Þetta er nördahátíð þannig að allt er í raun leyft. Það eina sem við biðjum um er að fólk sé ekki í óviðeigandi búningum því þetta er náttúrulega fjölskylduhátíð,“ segir Regína.

Hún bætir við að þau séu einnig með svokallað cosplay walk-on á hátíðinni fyrir þá sem vilja ekki taka þátt í keppninni en vilja samt sýna búninginn sinn. „Fólk kemur þá bara upp á svið í búningnum og getur gert nokkurn veginn hvað sem er, sagt eitthvað, sýnt dans eða bara snúið sér í hringi,“ segir Regína.

Það er hægt að skrá sig í keppnina fram að miðnætti á föstudag inni á midgardreykjavik.is.