Árni Þór Lárusson hefur tekið við hlutverki Gosa af Haraldi Ara Stefánssyni í hinni gríðarlega vinsælu barnasýningu Borgarleikhússins sem komin er aftur í sýningar eftir COVID-hlé. Árni Þór lauk leikaraprófi á háskólastigi frá LAMDA – London Academy of Music and Dramatic Art árið 2019 og flutti heim til Íslands í desember sama ár. Hlutverk Gosa er frumraun hans í atvinnuleikhúsi hér á landi.

Árni Þór segir að það hafi verið ótrúlega góð tilfinning að stíga á svið í hlutverki Gosa á fyrstu sýningu. „Ég er hluti af afskaplega góðum leikhópi sem er fullur af leikgleði og það fannst á áhorfendum að þá hafði þyrst í að komast aftur í leikhús. Það er mjög gaman að leika fyrir börn. Í hlutverki Gosa finn ég vel fyrir áhuga þeirra og stuðningi, þau halda sannarlega með sínum manni.“

Árni Þór Lárusson í hlutverki hins ástsæla spýtustráks Gosa sem glatt hefur kynslóðir. barna.

Eins og flest börn á Árni Þór sínar æskuminningar um Gosa. „Ég horfði mjög oft á Disney-teiknimyndina og amma las söguna um hann fyrir mig og mér fannst hún mjög skemmtileg.“

Mikið reynir á Árna Þór í hlutverki Gosa. Eins og allir vita þá er Gosi spýtustrákur og hreyfingar Árna Þórs verða vitanlega að taka mið af því. „Þetta er búið að vera krefjandi og það eru ýmisleg tæknileg atriði sem þarf að hafa á hreinu. Auk þess er ekkert hlé í sýningunni og ég er eiginlega inni á sviðinu allan tímann. Þetta er mikið fjör,“ segir hann.

Hann syngur í sýningunni og er þaulvanur söngmaður frá unga aldri og söng meira að segja sem skólastrákur með Ragnari Bjarnsyni. „Ég söng í drengjakór þegar ég var yngri. Gunnar Þórðarson var að taka upp jólaplötu með Ragga og hafði samband við kórstjórann. Ég var valinn til að syngja lag með Ragga á þessari plötu. Við Raggi ferðuðumst svo víðs vegar um landið og ég söng með honum. Hann var ótrúlega ljúfur og góður maður, mjög afslappaður og alltaf tilbúinn í næsta verkefni; að fara á svið og syngja og skemmta.“

Mikil röskun hefur orðið á leikhússtarfi í landinu vegna COVID. Árni Þór átti að leika í uppsetningu á Orlando í leikgerð Kristínar Eiríksdóttur en fresta varð verkefninu fram á næsta leikár. „Við höfum samt tekið samlestur og verkefnið er ótrúlega spennandi. Við erum orðin svo vön að bíða og sjá, það kemur bara í ljós hvenær sýningar geta hafist. Ég hef ýmislegt að gera, leik í Gosa og svo eru kvikmyndaverkefni og ýmislegt fleira á dagskrá,“ segir Árni Þór.