Mannyrkjustöð Reykjavíkur opnaði fyrir helgina en þar er hægt að komast í betri tengsl við sína innri plöntu að sögn þjónustuaðilanna Búa Bj. Aðalsteinssonar og Hrefnu Lindar Lárusdóttur.

Mannyrkjustöð er hluti af verkefni Reykjavíkurborgar, Torgi í biðstöðu og hefur það að megin markmiði að efla tengsl við náttúru, efla huga og líkama borgarbúa. Í Hljómskálagarði má finna fjórar æfingastöðvar: Rótun, vökvun, sólun og umpottun.

Tengjast náttúrunni innan borgarmarka

„Flest okkar kannast við umönnun plantna og því nýtum við plöntuna sem eiginlega myndlíkingu við mannseðlið. Verkefnið er mikilvægt skref í átt að bætum lífsgæðum og leitina að hinni innri plöntu,“ segja þjónustufulltrúarnir og vonast til þess að borgarbúar upplifi góðar stundir í tengslum við sínar innri plöntur. Flestir kannist við að fyllast tiltrú á lífið og tilveruna í tengingu við náttúruna.

„Fegurð fífilsins er nærri altaf aðgengileg og ónauðsynlegt að ferðast langt út fyrir borgarmörkin til að ná tengslum við umhverfið.“

Borgarbúra mega búast við mikilli jarðtengingu, tengsl við tilfinningalíf, þjálfun til sjálfræktar og umhyggju fyrir umhverfinu.
Fréttablaðið/Ernir Eyjólfsson

Gott að jarðtengja sig fyrir matarboðið

Búi og Hrefna segja þetta verkefni hafa lengi verið í bígerð.

„Við erum mjög þakklát fyrir að hafa verið treyst fyrir þessu verkefni, að vera þjónustufulltrúar og fá tækifæri til að aðstoða borgarbúa í vexti og þroska,“ segja þjónustufulltrúarnir.

Þau benda á að hægt sé að hringja í síma 537 5268 og fá leiðsögn í gegnum ferlið. Svo stendur til að vera með sérsniðin námskeið fyrir hópa síðar í sumar.

„Það getur verið nytsamlegt ef fólk er á leiðinni í matarboð eða þurfi að fást við erfiðar aðstæður, þá getur verið gott að tengja við sína innri plöntu til þess að vita hvar best er að staðsetja sig og hvernig eigi að bregðast við ögrandi aðstæðum. Ef við erum með sterkt rótarkerfi þá bognum við en brotnum ekki.“

Íbúar prófa stöðvarnar.
Fréttablaðið/Ernir Eyjólfsson

Einlægt flæði án dómhörku og hroka

Búi og Hrefna segja upplifunina hjá Mannyrkjustöðunni eiginlegt ferðalag um innra og ytra landslag.

„Verkefnið er byggt á mannplöntuverufræði sem er rýmið á milli manneskjunnar og plöntunar. Fræðin eru enn í mótun og er mannyrkjustöðin mikilvægur liður í áframhaldandi þróunnar á þessu sviði.“

Þá hafa þjónustufulltrúarnir tekið viðtöl við ýmsa aðila eins og líf- og grasafræðinga og heimspekinga til þess að dýpka skilning sinn á tilvist mannsins og samhengisins sem skapast af „verufræðilegum spekúlasjónum“ út frá plöntunni.

„Þar sem náttúran mætir manninum í einlægu flæði án dómhörku og hroka.“

Mannyrkjustöðin er staðsett í Hljómskálagarðinum við Bjarkargötu.