Bollywood leikarinn Aamir Khan ætlar sér að leika í og framleiða indverska endurgerð á Óskarsverðlaunamyndinni Forrest Gump frá árinu 1994 sem skartaði Tom Hanks í aðalhlutverki en þetta kemur fram í umfjöllun Variety. 

Khan sem er ofurstjarna innan indverska kvikmyndabransans, tilkynnti þetta á blaðamannafundi í Mumbai í dag en kappinn er 54 ára gamall og segist alla tíð hafa verið mikill aðdáandi upprunalegu myndarinnar. 

„Ég hef alltaf elskað handrit Forrest Gump. Þetta er yndisleg saga um þessa persónu. Þetta er lífsmynd, sem lætur öllum líða betur. Þetta er mynd fyrir alla fjölskylduna,“ segir gífurlega spenntur Khan. 

Khan framleiddi kvikmyndina Dangal, sem er vinsælasta mynd allra tíma frá Indlandi og halaði inn rúmlega 300 milljónum bandaríkjadollara. Forrest Gump fékk á sínum tíma sex Óskarsverðlaun og er ein vinsælasta mynd Tom Hanks frá upphafi.