Ég er auðvita mikill kanilsnúðaaðdáandi og elska Cinnabon í USA. Þessi uppskrift er eftirherma af þeim nema mig langaði að leika mér aðeins í tilefni af Bleikum október og hafa bleikt ostakrem smurt yfir snúðana,“ segir Berglind og það má með sanni segja að enn og aftur hittir Berglind í mark með bakkelsi sem enginn stenst. Berglindi er margt til lista lagt og hæfileikar hennar skína í gegn þegar kemur að því að baka og skreyta kökur og gleðja gestsaugað.

Það er um að gera að gleðja sína nánustu á Bleikum föstudegi eða í tilefni helgarinnar og baka þessa. Sérstaklega gaman að koma færandi hendi og skilja eftir bakka af bleikum snúðum við dyrnar hjá vinum og vandamönnum. Hægt er að fylgjast með blogginu hennar Berglindar á síðunni gotteri.is.

Bleikir snúðar á bleika föstudeginum hljóta að heilla gesti eða vinnufélaga.

Bleikir Cinnabon-snúðar

Snúðadeig

670-700 g Polselli hveiti

1 pk. þurrger (11,8 g)

120 g smjör

250 ml nýmjólk

100 g sykur

1 tsk. salt

2 egg

2 tsk. vanilludropar

Setjið hveiti og þurrger í hrærivélarskálina og blandið saman (haldið eftir hluta af hveitinu þar til í lokin). Bræðið smjörið í potti og hellið síðan mjólk, sykri og salti saman við og hrærið þar til ylvolgt. Hellið saman við hveitiblönduna og hrærið með króknum á meðan. Bætið eggjum og vanilludropum saman við og síðan restinni af hveitinu ef þurfa þykir. Egg eru misstór og því þarf mismikið hveiti. Setjið hveiti þar til deigið hnoðast vel saman en er samt frekar blautt í sér. Náið því þá úr hrærivélinni og hnoðið saman í höndunum, penslið skál með matarolíu og veltið deiginu uppúr, plastið og leyfið að hefast í um 45 mínútur. Fletjið þá út á hveitistráðum fleti í um 40 x 50 cm og smyrjið kökuform/eldfast mót sem er um 25 x 35 cm að stærð vel með smjöri.

Fylling

220 g púðursykur

3 msk. kanill

100 g smjör við stofuhita

Smyrjið útflatta deigið vel með smjöri. Blandið saman sykri og kanil og dreifið jafnt yfir deigið.Rúllið upp frá lengri endanum, skiptið niður í 12 einingar og raðið í formið. Plastið að nýju og leyfið að hefast aftur í um 45 mínútur.Bakið þá við 180°C í 20-25 mínútur eða þar til snúðarnir verða vel gylltir.

Rjómaostakrem

100 g rjómaostur við stofuhita

60 g smjör við stofuhita

200 g flórsykur

1 tsk. vanilludropar

Salt af hnífsoddi

Bleikur matarlitur (sé þess óskað)

Þeytið saman rjómaost og smjör. Bætið flórsykri saman við í nokkrum skömmtum, skafið niður á milli.

Bætið salti og vanilludropum við í lokin ásamt matarlit, sé þess óskað, og smyrjið yfir volga snúðana. Gott að leyfa þeim að standa í um 15 mínútur.

Snúðarnir líta vel út hjá Berglindi.