Trúnó er staðsettur á Hlemmi Mathöll við hliðina á Fjárhúsinu og má með sanni segja að hann lífgi upp á matar- og drykkjaflóruna sem þar er í boði.

Herborg Svana Hjelm framkvæmdastjóri og Birgir R. Reynisson matreiðslumeistari eru eigendur staðarins og aðspurð segjast þau hafa gengið með þessa hugmynd í maganum í nokkurn tíma um að opna þennan frumlega og skemmtilega stað. Herborg hefur átt þennan draum lengi.

„Ég sat í London við ána Thames og var að drekka freyðivín og hugsaði af hverju það væri ekki til svona hlýr og notalegur staður hérna heima, þar sem hægt væri að drekka freyðivín og njóta.“

Herborgu fannst vanta stað þar sem áherslan væri fyrst og fremst á freyðivín, þar sem væri bæði fjölbreytni í tegundum og verði og auðvelt væri að skreppa og njóta í góðra vinkvenna- eða vinahópi.

„Við erum að bjóða freyðivín á krana á 990 krónur glasið og svo erum við líka með dýrara freyðivín og kampavín. Fólk hefur því valið og allir ættu að finna eitthvað við sitt hæfi."

Eitt freyðivínsglas

Hvað dreif ykkur áfram í að opna nýjan stað í miðjum heimsfaraldri?

„Með hækkandi sól og freyðivín í hjarta fannst okkur alveg tilvalið að opna barinn og gleðjast. Þessi heimsfaraldur fer nú senn vonandi að ganga yfir og þá er fátt skemmtilegra en að setjast niður í góðra vina hópi og fá sér freyðivín, en við bjóðum einnig upp á fjölbreytt úrval af freyðivíns-kokteilum,“ segir Herborg og segir að viðtökurnar hafi verið alveg frábærar frá fyrsta degi.

Girnileg humarsúpa og auðvitað er kampavín á kantinum.

Blinis með silung og kavíar

Það er líka hægt að panta létta rétti með freyðivíninu.

„Við bjóðum upp á freyðivín á krana og létta rétti, sem henta vel ef vinir/vinkonur vilja hittast og fá sér eitt freyðivínsglas og fara á Trúnó, má þar nefna að við bjóðum upp á sjávarréttasúpu og blinis með silung og kavíar.“

Útlitið sótt í breskar hefðir

Staðurinn Trúnó er skemmtilega hannaður og veggfóðrið vekur sérstaklega athygli gesta fyrir sína fáguðu áferð og fallegar myndir af fjöðrum að breskri fyrirmynd.

„Mig langaði að hafa staðinn bleikan og litríkan, hlýlegan og pínu í anda breska hefðarfólksins.“

Það má með sanni segja að vel hafi tekist til og rómantísk stemning svífi yfir Trúnó með bleika litnum í forgrunni og gaman að fá svona nýjungar í borgina. Margir munu örugglega njóta þess að fá sér kampavín á sólardögum.