Rapparinn Slick Rick, sem hefur haft mjög mikil áhrif á hipphopp-tískuna í gegnum árin, á 56 ára afmæli í dag. Slick Rick er þekktur fyrir stórar og fyrirferðarmiklar gullkeðjur, lepp fyrir auga og sérhannaða Wallabee-skó frá Clarks, en hann er líka frumkvöðull þegar kemur að því að klæðast fínum tískumerkjum og jakkafatajökkum í yfirstærð, sem hefur haft mikil áhrif.
Slick Rick, sem heitir réttu nafni Richard Martin Lloyd Walters, fæddist í London en flutti til Bronx-hverfis í New York-borg þegar hann var 11 ára. Hann sló í gegn á 9. áratugnum og hefur haldið áfram að vera áhrifamikill síðan þá og er í dag eitt þekktasta andlit og nafn rappheimsins, þrátt fyrir að vinsældir hans hafi dalað og hann hafi ekki gefið út nýja plötu síðan árið 1999.
Alltaf í eins skóm
Í næstum 30 ár hefur Slick Rick valið að klæðast sérhönnuðum þykkbotna Wallabee-skóm frá Clarks með alls kyns breytingum og skrauti. Hann hefur haldið tryggð við merkið þrátt fyrir að orðinn sé til meiriháttar iðnaður í kringum strigaskó eftir að rapp náði almennum vinsældum. Fyrr í mánuðinum gaf hann líka út örheimildarmynd í samstarfi við Clarks um tengsl hans við skóna í gegnum árin.
„Stundum finnum maður fína skó, en Clarks Wallabee-skórnir verða alltaf mínir uppáhalds,“ segir Slick Rick sjálfur. „Þeir hafa ákveðið „swag“ og eru flottir á fæti og hafa verið það síðan á 9. áratugnum. Þangað til ég sé aðra skó sem eru jafn fínir á fótum minnihlutahóps verð ég að nota það sem virkar.“
Hannar allt sjálfur
Slick Rick líkir samsetningu klæðnaðar síns við handverk. Hann hannar sjálfur klæðnaðinn og alla aukahlutina sem hann notar á sviði og þar sýnir hann oft margbrotnar samsetningar. Hann gerir oft breytingar á fatnaði sem hann fær frá lítt þekktum merkjum og kynnir þannig merkin fyrir nýju fólki.
„Ég gerði það flott að ganga í merkjum eins og Bally og Kangol og skapaði meiri tekjur fyrir þessi fyrirtæki en nokkru sinni áður,“ segir Slick Rick. „Ég hjálpaði líka við að kynna Clarks-merkið á sama hátt. Aðdáendur eru fljótir að bera kennsl á einstakan og einkennandi stíl minn.“
Menningararfleifðin
Slick Rick skapaði útlit sem varð hluti af grunninum í hipphopp-tískunni og vegna þess er einn af höttunum hans og augnleppur til sýnis á þjóðminjasafni Bandaríkjamanna af afrískum uppruna (National Museum of African American History).
Þegar Slick Rick kom fyrst fram á sjónarsviðið var stíll hans áður óséð blanda af tignarleika og fínleika í bland við götutísku og það er mikilvægasta arfleifð hans í tískuheiminum. Hann kynnti útlit sem hafði gríðarleg áhrif á hipphopp-tísku. Útlit hans hefur þróast í gegnum tíðina, en hann hefur alltaf haldið í sérkennin.
