Piparkökuhúsið sem Rannveig bjó til í ár er búið til að fyrirmynd Næpunnar við Skálholtsstíg í Reykjavík. Það er ekki auðveldasta húsið til að líkja eftir með piparkökum en þau sem þekkja húsið vita að ofan á því er mjög sérstakur turn sem er líkur næpu í laginu.

„Ég ólst ekki upp við þá hefð að búa til piparkökuhús. Ég gerði mitt fyrsta hús fyrir jólin 2007 þannig að ég er að gera þetta í 15. skiptið í ár,“ segir Rannveig.

„Skemmtilegast finnst mér að gera húsin alveg upp úr sjálfri mér en þetta er í fjórða sinn sem ég sæki innblástur í raunverulegt hús. Árið 2008 var það kirkjan frá heimabæ mínum Suðureyri, árið 2016 var það Phantom Manor frá Disneylandi í París og árið 2018 var það París hér á Akureyri, sem fólk þekkir sem Bláu könnuna.“

Jólatréð bakvið húsið úr 30 piparkökustjörnum.
Mikil vinna fór í smáatriðin, eins og handriðið, kransana og slaufurnar.

Kúpta þakið áskorun

Rannveig segir að hafi verið svolítið vesen að búa til kúpta turninn á piparkökuhúsinu í ár.

„Ég reyni að gera eitthvað nýtt á hverju ári til að gefa sjálfri mér smá áskorun og í ár voru það tröppurnar með handriðinu og einmitt kúpta þakið. Það er samsett úr fjórum hlutum, efsti hlutinn er ísform, en undir því eru tvær piparkökur sem bakaðar voru yfir kleinuhringjamóti og urðu því eins og hálfgerðar piparkökuskálar. Þær eru svo festar saman til að mynda kúlu. Þegar ég var búin að baka skálarnar þá kom í ljós að þær voru ekki nægilega háar þannig að ég stakk einu poppkexi á milli þeirra til að fá auka hæð,“ útskýrir Rannveig.

Gluggana býr Rannveig til úr brjóstsykri sem hún brýtur niður í litlar agnir og bræðir í gluggaopin.

„Ég nota alltaf gulan brjóstsykur svo birtan frá húsinu verði hlý,“ segir hún.

„Húsið er einfaldlega lýst upp með ljósaperu sem er í miðju húsinu. Ég kveiki svo bara á því eins og lampa og það lýsir í gegnum allan brjóstsykurinn í gluggunum. Í minni húsum sem ég geri hef ég litlar ljósaseríur.“

Það vefst oft fyrir mörgum að festa saman piparkökuhús, en Rannveig festir það saman með sama kreminu og hún notar til að skreyta það.

„Það heitir Royal Icing og er blanda af flórsykri og eggjahvítu. Svo er þetta bara þolinmæðisvinna. Ég myndi ráðleggja fólki að setja húsið saman góðum tíma áður en á að skreyta það,“ segir Rannveig. En það heppnaðist hjá henni í fyrstu tilraun að setja saman húsið í ár.

„Þetta er hæsta húsið sem ég hef gert og ég átti von á því að turninn myndi mögulega gefa sig þar sem næpan er þung, en þetta gekk stóráfallalaust fyrir sig,“ segir hún og hlær.

Rannveig veit fátt skemmtilegra en að undirbúa jólin.

Tímafrekt föndur

Húsið er 55 cm á hæð og það tók Rannveigu 20 klukkustundir að baka það, skreyta og byggja. Það er samsett úr 94 piparkökum og jólatréð við bakhlið hússins er samsett úr 30 piparkökustjörnum.

„Það er hægt að borða allt húsið, en það stendur svo lengi að við höfum ekki haft lyst á því,“ segir Rannveig.

Rannveig er mikill föndrari en hún segir að piparkökuhúsin séu mjög tímafrek og er hún allt árið að teikna upp sniðin. Mikil vinna fer í smáatriðin eins og handriðið, kransana og slaufurnar sem Rannveig gerir frá grunni. Í strompunum er svo reykelsi og því hægt að fá reyk upp úr þeim.

„Mér finnst gaman að gera hluti frá grunni. Ég föndra til dæmis aðventudagatöl fyrir börnin mín og geri skreytingar,“ segir hún.

„Ég er mikil jólamanneskja en í raun kannski meiri aðventumanneskja, þar sem mér finnst undirbúningurinn fyrir jólin það allra skemmtilegasta sem ég geri.“

Hugsað er fyrir hverju smáatriði í skreytingum.