Hljómsveitin Bjartar sveif lur er skipuð þeim Arnari Inga Viðarssyni, Loja Höskuldssyni, Úlfi Alexander Einarssyni, Kára Einarssyni, Ólafi Daða Eggertssyni og Magnúsi Degi Sævarssyni. Hún er sérstök fyrir þær sakir að hún spilar einvörðungu ábreiður. Áður höfðu þeir allir spilað í hljómsveitum, sumir í sömu sveit og aðrir einungis þekkst lítillega.

Við stofnun sveitarinnar skapaðist þó sterk og mikil vinátta milli meðlima. Mikil spilagleði og hressleiki einkennir hljómsveitina og myndast oft rafmögnuð dansstemning á tónleikum. Þeir voru allir fyrir í hljómsveitum, sem spiluðu tónlist nokkuð ólíka þeirri sem þeir spila í Sveiflunum.

„Við komum allir úr rosalega mikilli indí-senu. Allir búnir að vera í mörgum hljómsveitum, mörgum verkefnum sem standa kannski stutt en eru mjög metnaðargjörn. Bjartar sveiflur byrjuðu í raun sem nokkurs konar afmælisgjöf til vinkonu okkar, Ólafar Rutar,“ segir Arnar Ingi. Loji og Arnar Ingi segja áframhaldandi bókanir eftir fyrsta giggið hafa orsakað að Bjartar sveif lur ákvað að halda áfram.

„Í afmælinu fórum við í gegnum sama settið tvisvar sinnum út af góðum undirtektum, við vorum með svo stutt sett, bara fjögur lög. Dreams með Fleetwood Mac, Nothing Compares 2 U með Sinead O’Connor, Wicked Games með Chris Isaak og Þú fullkomnar mig með Sálinni hans Jóns míns,“ útskýrir Loji, en upptalningin gefur nokkuð góða mynd af hvernig tónlist Bjartar sveiflur spilar á tónleikum. Þó hefur færst meiri breidd í lagavalið og nú spila þeir lög úr ólíkustu áttum.

Sveitin varð til þegar þeir spiluðu saman ábreiðulög í afmæli vinkonu þeirra.
Mynd/Magnús Anderssen

Leynimakkið hausverkur

Sveitin hefur lítið spilað síðasta árið, vegna ástandsins. Í raun varla spilað í tvö ár, ef frá eru skilin tvö gigg á síðasta ári.

„Þetta eru fyrstu tónleikarnir okkar fyrir almenning í tvö ár, fyrir utan LungA. Svo var það eitt brúðkaup,“ segir Loji. Þeir vilja meina að gífurlega flókið ferli liggi að baki lagavalinu.

„Þetta er pólitík,“ segir Loji.

„Já, þetta er gríðarleg pólitík. Svo höldum við strákarnir í bandinu hlustunarpartí og síðan er neitunarvald,“ útskýrir Arnar Ingi.

„Það er mikið um leynimakk. Meðlimirnir eru að gera leynilega „díla“ sín á milli, svona til að fá sín lög í gegn,“ bætir Loji við.

„Það eru hrossakaup á lögum, ég held að það einkenni bandið mjög mikið. Ef þú segir já við þessu lagi, þá skal ég segja já við þínu lagi,“ segir Arnar Ingi.

„Svo oft þó að eitthvert lag sé komið í gegnum þetta ferli, þá eru samt bara helmingslíkur á að við endanlega fílum það þegar við spilum það,“ segir Loji.

Þannig að þið hafið mögulega farið í gegnum þúsundir laga?

„Já, ég myndi segja það, það hljómar alls ekki eins og vitlaus tala,“ svarar Loji glettinn.

„Þetta er með svona ómarkvissasta lagavali hljómsveitar sem fyrirfinnst,“ segir Arnar Ingi og heldur svo áfram: „Því eftir allt leynimakkið, sem er oft algjör hausverkur, neitunarvaldið og hrossakaupin, þá spilum lögin og þau falla kannski kylliflöt á æfingu.“

Covidpásan var kærkomin þar sem bandið var að spila nánast allar helgar fyrir það.
Fréttablaðið/Óttar

Vel úthvíldir

Bjartar sveiflur fá gjarnan til sín þekkta gestasöngvara og því ekki úr vegi að spyrja Loja og Arnar Inga hvort einhver slíkur mæti á morgun.

„Það átti að vera leynigestur en það virðist enginn komast. Þannig að það er enginn núna nema eitthvað ótrúlegt gerist, skrifaðu samt að það sé leynigestur,“ segir Arnar Ingi, sposkur.

Svarið gefur til kynna að einhver leynigestur mæti á svæðið.

„Nei, nei, Arnar, eigum við ekki bara að vera hreinskilnir og segja að það er enginn gestur, því það er enginn gestur?“ segir Loji við Arnar.

„Nema eitthvað ótrúlegt gerist!“ svarar Arnar Ingi, sem vill greinilega að mystíkin fái að svífa yfir vötnum, svona sérstaklega ef eitthvað ótrúlegt gerist.

Sveitin hefur nýtt tímann og er búin að æfa nokkur ný lög sem frumflutt verða á tónleikunum, eða öllu heldur verða frumflutt í þeirra útgáfu.

„Ég verð að segja að þessi Covidpása var eiginlega kærkomin, við vorum byrjaðir að spila svo ótrúlega mikið. Það var gott að fá þá Bjartar sveiflur gefa tóninn fyrir bjartari tíma.

„Sveitin hlakkar mikið til að spila á ný eftir góða pásu og koma svo aftur saman,“ segir Loji.

Þannig að það er jafnvel von á Bjartari sveiflum annað kvöld?

„Þetta verða Bjartar sveiflur að setja tóninn fyrir bjartari tíma. Við erum bæði svo spenntir að spila en líka svo vel úthvíldir,“ svarar Arnar Ingi, en sveitin er fullbókuð í sumar ef frá eru taldar tvær helgar sem sveitin ætlar að taka í sumarfrí.

Sveitin hlakkar mikið til að spila á ný eftir góða pásu.
Fréttablaðið/Óttar

Þrautseigt ábreiðuband

Loji segir sveitina hafa sett sér eina reglu við stofnun: Aldrei spila neitt frumsamið, og hefur það gengið eftir.

„Það sparar bandinu mikinn hausverk og er örugglega forsenda þess að við erum enn í gangi í dag, að það má ekki koma með neitt frumsamið,“ segir Arnar.

„Flestir eru góðir í að halda sig á mottunni, það tekur enginn sénsinn. Ég er ótrúlega ánægður með þessa reglu,“ segir Loji.

„Það myndaðist mjög skemmtileg dýnamík hjá okkur fljótt eftir fyrsta gigg, þess vegna held ég að bandið sé svo þrautseigt, þrátt við að vera ábreiðuband. Okkur finnst svo gaman að hanga og gera hluti saman.“

Hvernig verður svo stemningin á tónleikunum á morgun? „Bara fín, held ég,“ svarar Loji.

Tónleikar Bjartra sveiflna eru annað kvöld á KEX og hefjast klukkan 21.00. Það er frítt inn