Hjallakirkja býður landsmönnum á sérstaka Bítlamessu á eftir klukkan 17:00. „Við erum aðdáendur allskonar tónlistar,“ segir Séra Sunna Dóra Möller, sóknarprestur skellihlæjandi spurð að því hvort hún sé sérlegur Bítlaaðdáandi.
„Við erum búin að vera að reyna okkur áfram í allan vetur með allskonar óhefðbundið helgihald og höfum verið að taka allskonar,“ segir Sunna og rifjar upp að fyrir og eftir áramót blés sóknin til sérstakrar Abba messu.
„Nú ákváðum við að keyra á Bítlana og erum gífurlega spennt. Þetta eru tvær hljómsveitir sem hafa náttúrulega breytt tónlistarsögunni og Bítlarnir sérstaklega,“ útskýrir Sunna. Hún segir fátt meira viðeigandi með hlýnandi veðurfari vorsins en Bítlamessa.
„Þetta hefur vakið mikla athygli og þegar við vorum með Abba messuna fyrir jól þá fylltum við kirkjuna. Þannig við finnum það að fólk hefur áhuga á því þegar við leikum okkur með tónlistina og helgihaldið,“ segir Sunna.
Hún segir aðspurð Bítlana fara geysilega vel með helgihaldi. „Algjörlega! Ég fékk þessa spurningu líka þegar við vorum með Abba messuna, því Abba er kannski ekki beint tengt trúnni en ég held að tónlist í sjálfu sér, sé svo þéttofin öllu sem við gerum í helgihaldinu. Við munum syngja All You Need Is Love og allt þetta og við finnum alltaf einhvern þráð.“
Sunna segist aðspurð ekki gera ráð fyrir öðru en fullri kirkju á sunnudag. „Við förum ekkert af stað með minni væntingar en þetta. Við þurfum að setja markið hátt og vonum bara að fólk hafi gaman af því að koma, því við erum með frábæra tónlistarmenn. Þetta eru algjörir snillingar.“
