„Við vorum að fá geggjaðar fréttir í gær. Hún Kristín Erla, sem er tólf ára, var besta leikkonan í hópi ungmenna á 200 mynda barnakvikmyndhátíð sem er ein af þeim stærstu í Evrópu,“ segir Helga Arnardóttir, handritshöfundur barnamyndarinnar Birta sem verður frumsýnd á Íslandi í byrjun næsta mánaðar.

Kristín Erla Pétursdóttir fer með aðalhlutverkið í Birtu og var valin besta leikkonan í hópi ungmenna, þvert á aldursflokka frá 7-18 ára, á Schlingel hátíðinni í Chemnitz í Þýskalandi sem er eins og Helga bendir á ein sú stærsta sinnar tegundar í álfunni. Kristín þótti bera af sem leikkona í Birtu sem var meðal um það bil 200 kvikmynda sem sýndar voru á hátíðinni þetta árið. Dómnefndin á Schlingel taldi leik hennar eftirminnilegan og áhrifaríkan þar sem hún þótti fara á afar trúverðugan hátt með hlutverk sitt.

Kristín er í Kvíslarskóla í Mosfellsbæ. Hún hefur leikið umtalsvert síðastliðin ár og meðal annars tekið þátt í Stundinni okkar. Hún sjálf segist ekki hafa búist við þessu og tíðindin hafi komið verulega á óvart þegar nafn hennar var kallað upp.

„Ég er einstaklega stoltur af Kristínu sem leikstjóri og einn framleiðenda myndarinnar. Það er í raun ekki hægt að óska eftir betra hrósi. Við hefðum einnig ekki getað verið heppnari með þessi verðlaun í þeirri hörðu samkeppni sem blasti við okkur.

Ég held að allir krakkar á Íslandi geti fundið eitthvað í sjálfum sér við að horfa á leik Kristínar og ég hlakka til að sýna þeim myndina,“ segir Bragi Þór Hinriksson, sem leikstýrði Birtu eftir handriti eiginkonu sinnar.

Dómnefnd Schlingel-hátíðarinnar hrósar Kristínu Erlu í hástert fyrir frammistöðuna í Birtu.
Mynd/Aðsend

Birta er fyrsta íslenska leikna barna- og fjölskyldumyndin frá því Víti í Vestmannaeyjum var frumsýnd árið 2018 en Bragi Þór leikstýrði henni einnig.

Birta verður frumsýnd Smárabíói, Háskólabíói, Laugarásbíói og Borgabíói á Akureyri þann 5.nóvember og einnig á Síminn Premium frá 25. nóvember samhliða sýningum í bíóhúsum.