Singles’ Day er hátíð þeirra sem vilja hafa það kósí á aðventunni, vera snemma í jólainnkaupunum og spara sér stórfé,“ segir Brynja Dan Gunnarsdóttir, forsprakki netútsöludagsins Singles’ Day á Íslandi.

„Ég hratt Singles’ Day af stað hér á landi árið 2014 því mér fannst ástæða til að kynna þennan frábæra dag fyrir Íslendingum. Hann hefur síðan vaxið og dafnað með hverju árinu sem líður og sífellt fleiri netverslanir stökkva á vagninn. Það er svo óneitanlega gaman þegar kaupmenn úr öllum áttum og í ólíkum verslunarrekstri geta verið vinir í einn dag og gert dásemdum netverslana hátt undir höfði,“ segir Brynja kát og full tilhlökkunar fyrir komandi Singles’ Day.

Stórútsöludagur heimsins

Nafngiftin Singles’ Day er upprunnin í Kína. Þar í landi er 11. nóvember í hávegum hafður sem Dagur einhleypra því dagsetningin 11.11. samanstendur af tölustafnum einum (1), sem vísar til þess að standa einn á eigin fótum og vera stoltur af því.

„Dagur einhleypra fékk nýja merkingu árið 2013 þegar kínverska stórfyrirtækið Alibaba, sem er án efa stærsti netverslunarrisi heims, ákvað að gera daginn að stórútsöludegi netverslana þar í landi. Það var gert til að koma jólaversluninni af stað og sem mótsvar við stórútsöludögunum Black Friday og Cyber Monday,“ útskýrir Brynja um tilurð Singles’ Day sem nú teygir anga sína um allan heim.

„Fyrir netverslanir á Íslandi var annaðhvort að hoppa á bandaríska Cyber Monday-vagninn eða kínversku Singles’ Day-kerruna, sem varð úr, enda víðfræg orðin um víða veröld. Þannig seldi Alibaba fyrir 17,8 milljarða Bandaríkjadala á Singles’ Day í fyrra en aðeins 3,34 milljónir dala á Black Friday. Það segir sitt um þetta risastóra og viðskiptavæna fyrirbæri sem Íslendingar geta nú tekið þátt í og nýtt sér hér heima.“

Afslættir sem um munar

Í árdaga netverslunar voru landsmenn hikandi við að gefa upp kreditkortaupplýsingar á netinu.

„Nú á dögum er það óþarfa hræðsla og löngu búið að sannreyna að kortaviðskipti á netinu eru örugg. Flest kort eru tryggð ef eitthvað óeðlilegt kemur upp á,“ segir Brynja sem í upphafi vildi sjá hvort Singles’ Day kæmi íslenskum netverslunum á flug eins og annars staðar í heiminum.

„Ég ákvað því að vekja athygli á þessum degi hér heima til að sjá hvort netverslun Íslendinga færi ekki á skrið. Sú varð raunin enda er þetta stórskemmtilegur dagur fyrir bæði verslanir og viðskiptavini þeirra og léttir mikið undir í jólastressinu,“ segir Brynja og víst er að bæði íslenskar netverslanir og íslenskir neytendur tóku Singles’ Day fagnandi.

„Viðtökurnar urðu fljótt ótrúlega góðar og ég hef ekki heyrt neitt nema gott frá þeim netverslunum sem tekið hafa þátt. Oftar en ekki hefur Singles’ Day reynst þeirra stærsti söludagur á árinu. Þetta er líka afsláttur sem um munar og telur vel þegar fólk þarf að kaupa margt og mikið fyrir jólin,“ upplýsir Brynja.

Brynja Dan segir sérlega huggulegt að geta klárað hagstæð jólainnkaup á netinu heiman úr stofu. MYND/ALDÍS PÁLSDÓTTIR

Hagstæð jólainnkaup heima í stofu

Singles’ Day er hvalreki fyrir þá sem vilja sleppa við langar biðraðir í jólaversluninni, tímafrekan umferðarþunga og ys og þys í aðdraganda jóla.

„Það er þægilegt að geta slakað á heima í stofu, tyllt sér upp í sófa með malt, appelsín og smákökur, komast í jólaskap og skoða sig um í glæsilegum netverslunum sem bjóða fádæma flottan varning á miklum afslætti á Singles’ Day. Langflestir nota þennan dag til að minnka jólastressið, klára að kaupa flestar ef ekki allar jólagjafirnar og fá þær sendar heim, jafnvel innpakkaðar með slaufu,“ segir Brynja sem hefur nýtt sér það óspart í gegnum árin að versla á netinu.

„Við erum jú öll meðvituð um ástandið í heiminum og allir reyna að minnka við sig og kaupa minna. Við gefum þó enn jólagjafir og þá er frábært að geta gert það á sem hagkvæmastan hátt fyrir budduna, draga úr mengun í umferðinni, forðast heilsuspillandi streituvalda, velja vörur sem mæta kröfum okkar um vistvænni lífsstíl og kaupa eitthvað vandað og sem okkur vantar í raun og veru. Mig bráðvantar til dæmis ryksugu og þá er upplagt að nýta sér tilboðin á Singles’ Day,“ segir Brynja sem keypti sér síðast sjónvarp í vefverslun.

„Þá fann ég sjónvarp á ómótstæðilegu tilboði og ákvað um leið að kaupa í matinn á netinu, en það fágætasta sem ég hef keypt á netinu er sennilega Vince Camuto-ferðataska sem ég datt niður á í Flórída þegar ég var þar að vafra um á vefnum eitt kvöldið. Uppáhalds netverslanir mínar í heiminum eru svo líklega ferðaskrifstofur, Dohop eða annað í þeim dúrnum,“ segir Brynja hress.

Hún hvetur sem flesta til að notfæra sér stórafslættina sem bjóðast á Singles’ Day hér heima enda sparar það umtalsverð fjárútlát á dýrum árstíma.

„Best er að ríghalda í Singles’ Day-blaðið, nýta sér tékklistann og skipuleggja sig sem best. Á miðnætti á sunnudaginn, þegar klukkan slær tólf og dagsetningin breytist í 11.11. fer maður inn á 1111.is og skoðar hvaða fyrirtæki eru með, hvað þau bjóða og á hvaða afslætti. Þá er auðvelt að smella á hvert fyrirtæki fyrir sig og vefsíðan flytur þig sjálfkrafa á viðkomandi síðu þar sem hægt er að gera bestu kaup ársins og undirbúa jólin heiman úr stofu,“ segir Brynja.

Munið vefgáttina, 1111.is, sem galopnar fyrir Singles’ Day-tilboðin á miðnætti 11. nóvember.