Taylor Swift, Ariana Grande og Billie Eilish unnu hver um sig þrenn verðlaun. Söngkonan Miley Cyrus ákvað svo, samkvæmt heimildum, á síðustu stundu að koma fram á hátíðinni og syngja nýjasta lag sitt, Slide Away. Hún gekk því ekki rauða dregilinn í byrjun hátíðarinnar en var mynduð baksviðs með kærustu sinni, Kaitlynn Carter. Margir telja lagið Slide Away fjalla um hjónaband Miley og leikarans Liams Hemsworth, þá sérstaklega hvað olli því að það endaði í skilnaði. Stjörnurnar voru hver annarri flottari og hér er því stutt samantekt á þeim sem þóttu bera af.

Íslandsvinkonan Zara Larsson mætti í fölbleikum kjól með langan slóða.
Systurnar Gigi og Bella Hadid mættu í stíl. Fregnir herma að skipuleggjendur hátíðarinnar hafi haft annað sætið við hlið Gigi autt, skyldi hana langa til að taka Bachelorette-keppandann Tyler Cameron með sér, en þau hafa verið að slá sér upp undanfarið.
Kærustu­parið Shawn Mendes og Camila Cabello kusu að labba ekki dregilinn saman, en áttu þó sjóðheita framkomu á hátíðinni þegar þau fluttu lagið ­Señorita.
Leik- og söngkonan Hailee Steinfeld var glæsileg í þessum rauða blúndu­kjól.
Leikkonan Keke Palmer flott í gulum og glitrandi kjól, en hún átti einmitt 26 ára afmæli sama dag og hátíðin fór fram. Myndir/Nordic Photos/getty