Eyþór er fæddur og uppalinn í Suður-Þingeyjarsýslu, umvafinn íslenskri náttúru þar sem hann hefur ávallt sótt innblástur í störf sín. Við fengum Eyþór til að deila með okkur sínum jólahefðum og -siðum, ásamt því að gefa uppskriftir af glæsilegum jólahátíðarmatseðli sem kitlar bragðlaukana. Þegar hann er spurður um hvað sé ómissandi, svarar hann:
„Mandarínur og jólabjór. Svo er nauðsynlegt að fara allavega á eina jólatónleika. Það hefur myndast hefð fyrir því hjá okkur að fara á afmælisdaginn minn, 20. desember, í bæinn og taka út jólastemninguna, fara saman á skauta og út að borða. Þetta er ótrúlega skemmtileg hefð sem börnin elska.“
Margir eiga sér fallegar jólaminningar og Eyþór segir að hann eigi eina sem standi algjörlega upp úr.
„Ég bað konuna mína að giftast mér á aðfangadagskvöld fyrir tíu árum, algjörlega ógleymanlegt kvöld.“
Glæsilegir jólaréttir
Á heimili Eyþórs er haldið í matarhefðir um jólin sem hann og kona hans hafa skapað saman.
„Það er komin góð rútína á jólamatinn hjá minni fjölskyldu, við erum með okkar hefðir frá Þorláksmessu og fram yfir hátíðirnar. Á aðfangadagskvöld borðum við humarsúpu og andabringur sem ég set í sérstakan pækil með appelsínuberki og jólakryddum. Ég var alinn upp við að borða rjúpur og þær eru alltaf uppáhalds.
Við borðum ekki alltaf eftirrétt vegna þess að humarsúpan er svo seðjandi. Stundum hef ég gert pavlovu en í ár er ég að hugsa um að gera gamaldags After Eight ís, ég er að vona að hann slái í gegn hjá börnunum. Á gamlárskvöld er það lítill humarréttur sem við framreiðum, en hann getur verið breytilegur eftir árum. Síðan er það Wellington nautasteikin og hasselback kartöflur. Spurning með að hafa créme brulée þessi áramótin í eftirrétt.
Eyþór segist ekki baka mikið á aðventunni.
„Aðventan fer oftast í mikla vinnu hjá mér og svo í að gera eitthvað með fjölskyldunni. Konan mín sér meira um að baka. En frá aðfangadegi og fram yfir áramót snýst allt um mat heima fyrir. Hreindýrið er réttur sem ég hef notað í minni veislum í gengum tíðina, en rjúpan og bakan eru réttir sem ég gerði í sjónvarpsþáttunum mínum fyrir nokkrum árum. Þetta eru allt réttir sem að slá alltaf í gegn.“
Hreindýravöðvi í sveppahjúpi
Allar uppskriftir eru fyrir 4
800 g fullhreinsaður hreindýravöðvi
2 box sveppir (smátt skornir )
5 stk. skallotlaukur (skrældur og smátt skorinn)
1 hvítlauksrif (fínt rifið)
4 msk. brauðrasp
1 poki spínat (100 g)
ólífuolía til steikingar
sjávarsalt
svartur pipar úr kvörn
Hitið pönnu með olíu á og steikið sveppina í 3 mínútur, bætið lauknum út á pönnuna og steikið þar til laukurinn og sveppirnir eru orðnir gullinbrúnir. Steikið spínatið upp úr ólífuolíunni, setjið það á skurðarbretti og skerið það niður. Setjið laukinn, sveppina og spínatið í skál með hvítlauknum og brauðraspinu. Smakkið til með saltinu og piparnum.
Hitið pönnu með olíu og brúnið hreindýrið allan hringinn í ca. 30 sek. á hvorri hlið, setjið í eldfast mót og hjúpið vöðvann með sveppablöndunni. Setjið inn í 180°C gráðu heitan ofninn í 13 mínútur. Takið út, setjið bakka yfir og látið hvíla í 10 mínútur. Gott er að kjötið nái 52-54 gráðum í kjarnhita.
Kremuð sveppasósa
1 hvítur laukur
2 hvítlauksrif
olía til steikingar
100 ml hvítvín (má sleppa)
200 g blandaðir frosnir villisveppir
½ l rjómi
150 ml kjúklingasoð, eða vatn og kraftur
safi úr 1 límónu
sjávarsalt
svartur pipar úr kvörn
kjúklingakraftur
Skrælið og skerið laukinn og hvítlaukinn í þunnar skífur. Steikið laukinn við lágan hita þar til hann er orðinn mjúkur í gegn. Hellið hvítvíninu yfir laukinn og sjóðið það niður um helming. Hellið soðinu (eða vatninu) og rjómanum í pottinn og sjóðið við lágan hita í ca. 30 mínútur eða þar til sósan fer að þykkna. Maukið sósuna með töfrasprota. Smakkið hana til með lime safanum, salti, pipar og kjúklingakraftinum eftir smekk.
Graskers-, peru- og gráðaostssalat
400 g grasker skorið í teninga
1 rauðlaukur, gróft skorinn
1 msk. rauðvínsedik
1 msk. sykur
1 fullþroskuð pera
4 msk. ristaðar pekanhnetur (5 mín. 180 gráður)
20 steinlaus vínber
2 msk. gráðaostur
1 msk. sýrður rjómi
Ólífuolía
Sjávarsalt
Svartur pipar
Bakið graskerið við 180°C gráðu hita í 30 mínútur og kælið það niður. Setjið rauðlaukinn í eldfast mót. Veltið honum upp úr edikinu, sykrinum, saltið og piprið og bakið í 10 mínútur við 180°C gráður. Skerið peruna og vínberin niður og setjið í skál með rauðlauknum og graskerinu. Blandið hnetunum út í ásamt sýrða rjómanum og gráðostinum og smakkið til með salti og pipar.
Epla- og brómberjakaka með vanillu-mascarapone kremi
Fylling í böku
2 epli, græn
250 g brómber
2 ½ msk. maizenamjöl
50 g sykur
Skrælið og skerið eplin í teninga og setjið í skál með brómberjunum hellið sykrinum og maizenanu yfir eplin og brómberin og blandið öllu vel saman.
Mascarpone krem
250 g mascarpone ostur
100 g hrásykur
1 vanillustöng
Börkur af 1 sítrónu
Þeytið allt saman þar til kremið er orðið mjúkt og setjið í sprautupoka.
Bökudeig
200 g smjör
200 g hrásykur
225 g hveiti (sigtað)
1 tsk. lyftiduft (sigtað)
Þeytið smjör og hrásykur saman þar til það er orðið ljóst og létt. Bætið þurrefnunum saman við smjörið og sykurinn og blandið varlega saman. Hjúpið bökuformið með ca 60% af deiginu, passið að hafa deigið jafnþykkt alls staðar. Hitið ofninn í 180°C gráður. Setjið eplin og brómberin ofan á bökudeigið. Sprautið mascarponekreminu yfir eplin og brómberin og endið svo á að hjúpa allt saman með afganginum af bökudeiginu. Bakið í 40 mínútur eða þar til skorpan er orðin gullinbrún.
Steiktar rjúpubringur á kremuðu grænkáli með bláberjum og gráðosti
4 rjúpubringur
20 g smjör/olía til steikingar
Sjávarsalt
Svartur pipar úr kvörn
Setjið bringurnar á heita pönnu með olíu og brúnið í 45 sek. á annarri hliðinni, snúið þeim við og bætið smjörinu út á pönnuna. Steikið bringurnar á hinni hliðinni í 45 sek. og ausið smjörinu yfir á meðan. Setjið í eldfast mót með álpappír yfir og látið hvíla þar undir í 10 mínútur. Skerið bringurnar, og kryddið með saltinu og piparnum.
Kremað grænkál með gráðosti
2 pokar grænkál (200 g)
½ l rjómi
2 skallotlaukur (gróft skorinn)
1 msk. grænmetisþurrkraftur
Safi úr ½ sítrónu
Sjávarsalt
Svartur pipar úr kvörn
40 g gráðostur
Skerið stilkinn af grænkálinu og setjið í pott með skallotlauknum og rjómanum. Kveikið undir pottinum og setjið á rúmlega hálfan styrk. Bætið gráðostinum út í og sjóðið allt saman í 10 mínútur. Smakkið til með grænmetiskraftinum, sítrónusafanum og saltinu og piparnum.
Meðlæti
1 fennel
1 box bláber
2 radísur
Skerið radísurnar og fennelið þunnt í mandólíni eða með hníf og setjið á diskinn í kringum rjúpuna ásamt bláberjunum.
Jólakryddaðar möndlur
150 g möndlur
2 msk. hunang
½ tsk. cayenne
½ msk. svartur pipar úr kvörn
1 tsk. kanill
½ tsk. negull
1 tsk. sjávarsalt
Setjið möndlurnar í 150°C gráða heitan ofninn í 30 mínútur. Takið út úr ofninum og setið hunangið yfir þær ásamt kryddinu og blandið öllu saman. Setjið inn í ofninn í 10 mínútur. Takið út úr ofninum og setjið á smjörpappír.
