Áskrifendur að streymiþjónustunni Netflix geta tekið gleði sína því David Attenborough er á leiðinni í enn eitt ferðalagið þar sem hann mun fjalla um söguna og náttúruna í átta þátta seríunni Our Planet.

Þáttaröðin verður gefin út í apríl að því er The Guardian greinir frá. „Í dag erum við stærsta ógn náttúrunnar, heimilis okkar, en við þurfum að bregðast við þessum áskorunum núna – við höfum enn tíma,“ var haft eftir Attenborough þegar greint var frá þáttunum í dag.

Attenborough er í margra augum goðsögn í lifanda lífi en hann hefur glatt margan áhorfandann í gegnum tíðina, til að mynda með þáttaröðum á borð við Blue Planet og Planet Earth.