,,Ég var bara að klára að taka allt til. Ég tók til geisladiskana mína, húfur og bolla. Nefndu það bara, ég á alveg alls konar,“ segir Atli glaður í bragði. Hann var meira en lítið til í að ræða aðdáun sína á hljómsveitinni, en hann hefur verið dyggur aðdáandi hennar í nokkra áratugi. Atli segir að á sínum tíma hafi minningartónleikarnir um Freddie Mercury gert útslagið og hann hafi verið eldheitur aðdáandi Queen allar götur síðan.

Spenntur fyrir We Will Rock You

Þegar það var tilkynnt á sínum tíma að söngleikurinn We Will Rock You yrði settur á fjalir Háskólabíós nú síðar í sumar, varð aðstandendum sýningarinnar ljóst að Atli væri vafalaust einn helsti aðdáandi sveitarinnar á landinu í dag.

„Ég varð bara svo spenntur og sýndi komu sýningarinnar mikinn áhuga á Facebook. Sjálfur hafði ég einmitt hugsað í mörg ár hvenær það stæði eiginlega til að setja We Will Rock You upp á klakanum. Söngleikurinn hefur verið sýndur úti um allan heim.“

Atli hefur séð uppsetningu We Will Rock You í Bretlandi, Danmörku og Svíþjóð.

,,Í Svíþjóð var búið að þýða sum lögin. Ég sá upptökur frá æfingum hérna heima og heyrðist eitt lag í það minnsta vera sungið á íslensku, sem ég er alveg ótrúlega spenntur að sjá hvernig kemur út. “

Geisladiskasafnið er orðið mjög stórt og fær Atli oft muni tengda hljómsveitinni að gjöf.
Fréttablaðið/Valli

Á miða á tvær sýningar

Atli er nú þegar búinn að panta miða á tvær sýningar á íslensku uppsetningunni.

,,Ég keypti auðvitað miða á frumsýninguna. Svo fer ég með foreldrum mínum á sýningu númer tvö, þau ákváðu að bjóða mér með á hana, “

Atla finnst Björn Jörundur og Ragga Gísla passa ótrúlega vel við þau hlutverk sem þau leika.

,,Þau eru kröftugir söngvarar sem er einmitt sem þarf til að skila þessu af sér. Margir halda samt að þetta sé eins og tónleikar, en það er ekki raunin. Þetta er fyrst og fremst leikrit, en tónlistin auðvitað alveg frábær. Mér skilst líka að þetta verði svipað og í London og alveg svakalegt ,,show“. Ljósin muni spila mikið inn í sýningunar og það verði öllu tjaldað til. En annars er þetta líka mjög fyndin sýning og margir góðir brandarar,“ segir Atli.

Minningartónleikar voru haldnir um Freddie Mercury þann 20. Apríl árið 1992, um hálfu ári eftir að söngvarinn lést. Það var ákveðinn vendipunktur fyrir Atla þegar hann sá og heyrði upptökur frá tónleikunum.

,,Ég man að ég hugsaði hvað þetta væri ótrúlega flott tónlist. Ég mundi samt alveg eftir að hafa séð The Miracle í Skonrokki í gamla daga og heyrt I Want to Break Free í útvarpinu þegar ég var bara barn. Svo man ég líka óljóst eftir að hafa séð Live Aid á sínum tíma, en á þeim tónleikum stal Queen hreinlega senunni,“ segir Atli.

Miðinn á Queen og Adam Lambert á Wembley Arena 2017.
Fréttablaðið/Valli

Hitti Brian May fyrir tilviljun

Það er gífurlega skemmtileg saga bak við það þegar Atli hitti gítarleikara sveitarinnar, Brian May.

,,Ég var á röltinu í London því ég hafði misst af rútuferð. Þetta var á þeim tíma sem internetsamband í síma erlendis var lélegra og það varð til þess að ég missti af rútunni. Ég hafði stefnt á að fara í túristaferð um London þar sem heimili rokkstjarnanna voru skoðuð.“

Atli fann ekki rútuna og var frekar svekktur yfir því. Það reyndist honum þó til mikils happs.

,,Allt í einu labba ég, enn frekar svekktur, upp að einhverri langri biðröð fólks í Queen-bolum. Ég spyr næstu manneskju hvað sé eiginlega í gangi og þá kom í ljós að von var á Brian May að árita klukkan sex. Ég varð bara eins og Wayne’s World gaurarnir, svo spenntur varð ég. Mér fannst flott að hann mætti hálftíma fyrr því hann vildi ekki valda neinum vonbrigðum.“

Atli segist hafa verið svo spenntur að hitta átrúnaðargoðið að hann hafi hreinlega þurft að æfa sig og undirbúa.

,,Ég hef sjaldan verið jafn stressaður. Maður var auðvitað ekki að búast við þessu. Þetta var svo mikil tilviljun og heppni. Hefði ég ekki labbað nákvæmlega niður þessa götu í London á þessum tíma, þá hefði þetta aldrei gerst og ég ekki fengið mynd með honum og eiginhandaráritun.“

Vill Queen og Adam Lambert til Íslands

Atli hefur einnig hitt son trommara Queen, Rufus Taylor, sem er trommari eins og pabbi hans og spilar með hljómsveitinni The Darkness.

„Ég hitti hann í Danmörku 2015. Þar stóð fólki til boða að hitta meðlimi The Darkness, ég fór snemma í biðröðina inn á tónleikasvæðið,“ segi Atli.

Rufus hefur spilað með Queen og Adam Lambert, áður en hann gekk til liðs við The Darkness.

„Ég hef líka séð Queen spila með Adam Lambert á tónleikum. Það var algjör upplifun. Adam Lambert var góður, hann nær áhorfendum á sitt band. Hann er duglegur að spjalla við áhorfendur og segja brandara á milli laga. Hann er líka mjög góður söngvari. Það eru líka upptökur af Freddy spilaðar á tónleikunum, þá sturlast áhorfendur af gleði.“

Hann skorar á tónleikahaldara að flytja þá til Íslands.

„Það eru svo margir aðdáendur hérlendis að ég er alveg viss um að það myndi seljast upp, alveg handviss,“ segir Atli Þór.

Safnið hans Atla á munum tengda Queen er orðið töluvert stórt.
Fréttablaðið/Valli

Með stóra mynd af Freddie á stofuveggnum

Atli á marga safnmuni tengda hljómsveitinni.

,,Já ég á alveg alls konar hluti tengda hljómsveitinni, eitthvað sem ég hef keypt sjálfur en margt hef ég líka fengið í afmælisgjöf og jólagjöf. Það gengur hægast að safna vínylnum, því hann er orðinn svo dýr. Svo maður kaupir ekki mikið af honum. En ég á mikið af diskum og smáskífum. Svo á ég margar bækur og derhúfur. Auðvitað á ég svo slatta af bolum.“

Á veggnum í stofunni hans Atla er svo stór mynd af Freddie Mercury. Atli bjó í Danmörku í átta ár, þá reyndist honum auðveldar að ferðast á viðburði tengda hljómsveitinni.

Atli er mjög spenntur að sjá íslensku uppsetninguna á We Will Rock You og hefur þegar nælt sér í miða á tvær sýningar.
Fréttablaðið/Valli

Beðinn um að plötusnúðast á Queen-ráðstefnu

Atli er meðlimur í elsta aðdáaendaklúbb Queen sem enn er starfandi.

,,I honum hef ég kynnst mörgum flottum týpum, margir af meðlimum sáu þá á sviði fyrir mörgum árum. Ég hef meira að segja kynnst fólki sem hefur leikið í myndböndum hjá þeim. Hljósmveitin er í nánu samstarfi við þennan klúbb. Klúbburinn er líka með ráðstefnu á hverju ári, og stendur fyrir ýmsum viðburðum líka. Þau hafa til að mynda heimsótt heimaslóðir Freddie Mercury.“

Á næstunni stefnir klúbburinn á hópferð til Japan að sjá Queen og Adam Lambert spila.

,,Ég hef farið á einn viðburð. Hann var í Hollandi og þetta var bara eins og ein stór fjölskylda. Allir ótrúlega almennilegir og góðir. Ég kynntist þeim sem sér um klúbinn á þeim hittingi og komst að því að hann þekkti Freddie persónulega, sem er magnað.“

Hann stefnir á að mæta á næstu ráðstefnu, þar sem hann hefur verið beðinn um að plötusnúðast.

Atli stefnir á að mæta á næstu ráðstefnu elsta Queen-aðdáendaklúbbs heims, en klúbburinn er í góðu samstarfi við meðlimi sveitarinnar.
Fréttablaðið/Valli

Ánægður með myndina

Atli segist hafa verið mjög ánægður með bíómyndina sem gerð var um sveitina, Bohemian Rhapsody. Hann fór á hana nokkrum sinnum í bíó, þar af tvisvar á svokallaðra sing-a-long sýningar. En skemmtilegast af öllu var enn önnur gleðilega heppnin sem henti Atla tengd hljómsveitinni.

,,Það vildi svo til að ég var staddur í stuttri heimsókn í London. Þá fæ ég tölvupóst um að meðlimir í aðdáendaklúbbnum hefðu tækifæri að næla sér í miða á heimsfrumsýninguna á myndinni. Þetta var rosaleg upplifun, þetta var bara eins og að vera kominn í Hollywood. Þetta var svo miklu meira ómetanlegt því það var algjör tilviljun og heppni að ég hafi akkúrat verið úti á þessum tíma og fengið þetta tækifæri.“ segir Atli.

Atli sá allir helstu leikararana ásamt núlifandi meðlimum sveitarinnar á rauða dreglinum.

,,Svo bara er það túlkandi fyrir sveitina að allur ágóðinn af þessari sýningu rann til góðgerðarsjóðsins sem var stofnaður í minningu Freddi Mercury,“ segir Atli að lokum, stoltur af sinni allra uppáhalds hljómsveit.