Freydís Heba Konráðsdóttir, þjónustufulltrúi Sjóvá á Akureyri fékk nokkuð áhugaverðan tölvupóst nú á dögunum þar sem viðskiptavinur óskaði eftir svörum um kjör sín hjá fyrirtækinu í bundnu máli og óskaði eftir því að fá svör með sama hætti en Freydís varð að sjálfsögðu við því, líkt og fram kemur á heimasíðu fyrirtækisins.

„Ég var nú kannski mest stressuð yfir því að senda þetta frá mér ekki með neinum höfuðstaf og án bragfræðinnar, ég kann það frekar illa, en það var gaman að gera svona vísur“ segir Freydís létt í bragði í samtali við Fréttablaðið, en hún hefur ekki þurft að svara viðskiptavinum með slíkum hætti áður og það er ekki algengt. 

„Nei, ég get nú ekki sagt það. En ég geri nú alveg stundum vísur þegar maður er að grínast í vinum og svoleiðis. Það var mjög gaman að þessu og ég ákvað bara að taka áskoruninni þegar hann sendi þetta,“ segir Freydís en uppátækið hefur vakið þó nokkra athygli.

„Ég hef fengið nokkrar fyrirspurnir, þar sem fólk grínast svo með það hvort það fái ekki svar í bundnu máli,“ segir Freydís létt en meirihluti fyrirspurna er þó enn svarað í óbundnu máli.

Hér að neðan má sjá samskiptin á milli Freydísar og viðskiptavinarins, en nafni hans hefur verið breytt:

Svona hljóðaði fyrsti póstur frá viðskiptavini:

Kærar kveðjur sendi ég til Sjóvá
Sem tryggir mig af gömlum vana ennþá
En spurningin sem einhver þarf að svara 
Er Biggi Shark* að njóta bestu kjara? 

Svar óskast í bundnu máli.😁

Freydís svarar:

Sæll og blessaður Biggi Shark
þetta er nú skemmtilegt hark
ný iðgjöld reiknast eftir miðjan Jan
ég skoða þetta þá og vel ég man ;)

Í tölvupósti frá mér færðu
uppfærð gjöld og vonandi nærðu
helgarinnar vel að njóta
og jólunum upp skjóta

Viðskiptavinurinn svarar:

Sæl Freydís.
Þakka fyrir póst og ljóð
Leika við mig fljóðin rjóð
Í hjarta mínu kviknar glóð
Þótt kominn sé á ellislóð

Hugsaðu þér ef öll sam­skipti við fyr­ir­tæki og op­in­bera aðila yrðu að vera í bundnu máli.

Þá væri nú al­deilis gaman að lifa.😍

Bestu kveðjur.

Freydís svarar:

Sæll Biggi og góðan daginn
Vonandi gengur þér allt í haginn
Nýtt yfirlit ég sendi nú þér
Kjörin yfirfarin vel af mér
Þú ert að njóta okkar bestu kjara
Því við viljum ekki sjá þig fara
Tjónlaus ertu og áfram óbreytt
Í mars færðu þá endurgreitt
Ýmiss fríðindi fylgja Stofni
Þó að sú þekking með tímanum dofni
Takk fyrir áskorun í bundnu máli
Ég hafði gaman af þessu rjáli

Viðskiptavinur svarar:

Kæra Freydís.😍
Mikið vil ég þakka þér
Fyrir það að sinna mér
Þú hefur bæði kjark og þor
Til þess að yrkja vísnaspor
Heyrumst aftur eftir ár
Ef ég verð ekki óvarkár
Ég skal reyna að standa mig
Og þú ert alveg dásamleg

Kærar kveðjur,
Biggi Shark