Jólakúlurnar sem Sylvía gerir eru bæði fallegar og með alls konar myndefni og sumar hverjar eru afar persónulegar. „Ég byrjaði fyrst að mála á jólakúlur ein peningalaus jólin fyrir tólf árum til að redda jólagjöfum handa vinum og vandamönnum. Næstu jól á eftir byrjaði ég að selja þær á mörkuðum og í verslunum. Núna býð ég eingöngu upp á sérpantanir á kúlunum,“ segir Sylvía.

Það má nú ekki vanta Grýlu, Leppalúða og jólaköttinn

Sogast í að vera krútt

Ásamt því að mála á jólakúlur fyrir jólin málar Sylvía líka myndir og er bæði þreifandi og leitandi sem listamaður. „Ég leik mér með ýmsa stíla og langar alltaf mjög mikið að vera kúl og töff og segja eitthvað stórt sem listamaður. En svo sogast ég ósjálfrátt til baka í að vera krútt og gera eitthvað dúllulegt og fallegt. Það sem ég sæki nefnilega mest í og er mér eðlislægt, er að segja sögur og ná ákveðinni tilfinningu. Ég sæki rosalega mikið í ró og kyrrð, myrkrið og kuldann.“

Barnakúlurnar eru alltaf vinsælar. Hér hafa tvíburar fæðst.

Persónulegar jólakúlur

Að sögn er alltaf vinsælt að biðja um klassískar jólakúlur eins og með jólasveinunum, Grýlu eða Leppalúða. „Aðrir sérpanta persónulegri kúlur eins og parakúlur, fjölskyldukúlur, afa- og ömmukúlur, vinkonukúlur, fyrstu-jólinkúlur eða með einhverju sérstöku frá árinu sem er að líða. Svo hef ég fengið alls konar skemmtilegar og sérstakar beiðnir eins og að fá geimverur á kúluna eða huldufólk, Star Wars eða þriðja augað. Svo er líka alltaf vinsælt að fá gæludýrin á kúlur.“

Sylvía málar líka fjölskyldukúlur.

Mörg þúsund jólakúlur

„Í ár er ég líklega búin að mála á um 60 kúlur, en það er mismikið eftir árum hversu mikið er að gera hjá mér og hversu margar kúlur ég mála á. Ætli ég hafi ekki allt í allt málað á einhvers staðar á milli 2.000 og 3.000 jólakúlur. Mér þykir ótrúlega vænt um allar kúlurnar sem ég hef málað og hef merkilega gaman af þeim ár eftir ár. Mér finnst alltaf gaman að gera kúlur eftir teikningum barna. Það er auðvitað ekki mín listsköpun, en ég ímynda mér gleðina þegar börnin opna pakkann og sjá myndina sína á kúlu, og það gleður mig.“

Englakúlurnar málar Sylvía af sérstakri alúð, ást og styrk.

Fullt af ást í hverri kúlu

Þær allra uppáhalds og eftirminnilegustu kúlurnar segir Sylvía þó vera englakúlurnar. „Það eru þær sem ég geri fyrir fólk sem hefur misst börn. Englakúlurnar eiga sérstakan stað í hjarta mínu og ég vanda mig extra við þær og hugsa sérstaklega fallega og set fullt af ást og styrk í þær.“ Jólakúlurnar hennar Sylvíu og aðra listmuni má finna á Facebook-síðu hennar, Sylvía Björgvins Vinjars, og á Instagram. Undanfarið hefur Sylvía einnig unnið að skemmtilegu verkefni með stráknum sínum og tengdadóttur. „Þetta er spil sem heitir Reckless Sloths. Spilið er hans hugmyndavinna og ég sé um teiknihliðina. Spilið er núna á Kickstarter og hefur gengið ótrúlega vel.“

Sylvíu þykir vænt um allar kúlurnar sem hún hefur málað á og hefur alltaf jafngaman af þeim ár eftir ár
Ketkrókur prýðir þessar jólakúlur, eftirvæntingarfullur með hangiketið.
Ætli hér sé kominn Pottaskefill?
Hér er krúttlegt par að njóta í aðdraganda jólanna.